„უკრაინაში ქართველების ბრძოლასთან ჩვენ ვართ აბსოლუტურად გამიჯნული“, - ამის შესახებ პრემიერ-მინისტრმა „ექსპო-ჯორჯიაში“ მედიასთან შეხვედრის დროს განაცხადა.

მისი თქმით, თავიდანვე იყო ნათქვამი, რომ მთავრობა უკრაინას მხოლოდ ჰუმანიტარულ დახმარებას აღმოუჩენდა.

„იცით რომ გავაგზავნეთ მედიკამენტები, ათასი საშუალებები. ეს იყო ჰუმანიტარული დახმარება მხოლოდ. დანარჩენზე მე ვერ გიპასუხებთ, ჩვენ ვართ გამიჯნული აბსოლუტურად და მე გეტყვით, რომ ჩვენ ჩვენს უკრაინელ ხალხს რა თქმა უნდა ვუცხადებთ სოლიდარობას და ჩვენთვის ძალიან მძიმეა ის რაც ხდება უკრაინაში. ჩვენ არაერთხელ განგვიცხადებია ეს, მაგრამ ჩვენი სოლიდარობა და დახმარება გამოიხატება მხოლოდ ჰუმანიტარული დახმარების სახით" - განაცხადა ღარიბაშვილმა