გრიგოლაშვილის დაკრძალვას ხელისუფლების წარმომადგენლები დაესწრნენ

პოლიტიკა - 16:17, 25 Dec, 2014

2375

ქუთაისში უკრაინაში დაღუპული ქართველი მებრძობის ალექსანდრე გრიგოლაშვილის დაკრძალვას საკანონმდებლო და აღმასრულებელი ხელისუფლების წევრები დაესწრნენ.

დაკრძალვის ცერემონიას თავდაცვის მინისტრის მოადგილე კახა ოქროჯანაშვილი და თავდაცვის სამინისტროს ადმინისტრაციის უფროსი კახა ჩიქოვანი დაესწრნენ, ხოლო საკანონმდებლო ორგანოდან - „ნაციონალური მოძრაობის“ და „ქართული ოცნების“ თითქმის სრული შემადგენლობა.

"საქართველოსთვის ბრძოლა არ არის მხოლოდ საქართველოს ტერიტორიაზე, ლექსანდრე იყო გმირი, არ აქვს მნიშვნელობა სად იბრძოლებდა ის უკრაინაში, თუ საქართველოში. მან საქართველოს ინტერესებს შეწირა თავი" - განაცხადა "რესპუბლიკური პარტიის" ერთ-ერთმა ლიდერმა დავით ბერძენიშვილმა.

ზაქარია ქუცნაშვილის თქმით მისთვის ადამიანურად გასაგებია პატრიოტი ადამიანების სურვილი , ებრძოლონ საქართველოს მტრებს ყველგან:

"ჩვენი ადამიანები პატრიოტები არიან და ამიტომაც მათი სურვილი საქართველოს მტრებს ებრძოლონ ყველგან ადამიანურად გასაგებია, ეს არის ძალიან მძიმე დღე ჩემთვის პირადად, რადგან ეს არის კიდევ ერთი ახალგაზრდა ქართველის დაკარგვის დღე "- აღნიშნა ქუცნაშვილმა.

გრიგოლაშვილი დღეს ქუთაისში დაკრძალეს. დაღუპულის ცხედარი დღეს დილით ხარების ეკლესიაში გადაასვენეს, დაკრძალვის ცერემონია კი 15:00 საათზე გაიმართა ცხედარი ოჯახის სურვილით, საგვარეულო სასაფლაოზე დაკრძალეს.

32 წლის ჯარისკაცი, 19 დეკემბერს „ლუგანსკის ოლქის ქალაქ სჩასტიესთან დაიღუპა.