ოკუპირებული ცხინვალის დე ფაქტო მთავრობა იმ საქველმოქმედო პროექტს აკრიტიკებს, რომელიც ერგნეთში იგეგმება.

ჟენევის მოლაპარაკებებში ჩართული საოკუპაციო რეჟიმის წარმომადგენელი მურატ ჯიოევი ამბობს, რომ 28 დეკემბერს ე.წ. საზღვრისპირა ტერიტორიაზე დაგეგმილი ღონისძიება ვითარებას გაამწვავებს.

მისი თქმით, თუ ოფიციალური თბილისი ერგნეთის ბაზრობის განახლებას აპირებს, ის სასიკეთო შედეგს ვერ გამოიღებს.

28 დეკემბერს ერგნეთში ერთდღიანი საქველმოქმედო საახალწლო ღონისძიება იგეგმება, იდეა კი არასამთავრობო ორგანიზაცია „მომავლის ცხინვალს“ ეკუთვნის.

ორგანიზაციაში განმარტავენ, რომ პროექტს ფინანსური დახმარება და მხარდაჭერა ევროკავშირმა და გაერო-ს განვითარების ფონდმა გაუწია და მას ერგნეთის ყოფილ ბაზრობასთან კავშირი საერთოდ არ აქვს.

მათივე ინფორმაციით, ღონისძიებაში მონაწილეობას მხოლოდ ოკუპირებული ცხინვალის რეგიონიდან დევნილები და ადგილობრივები მიიღებენ და ე.წ. საზღვრის მიღმა მყოფი სოფლებიდან თუ ქალაქებიდან სტუმრებს არ ელოდებიან.