არასამთავრობო ორგანიზაციები პარლამენტის წევრებს ფლეშმეხსიერების ბარათით ასაჩუქრებენ, სადაც საშობაო სიმღერებია ჩაწერილი. ამ სიმბოლური გზავნილით კამპანია, "ეს შენ გეხებას" წევრები დეპუტატებს მოუწოდებენ - "მოუსმინონ საშობაო სიმღერებს და არა - ხალხს".

"კამპანია "ეს შენ გეხება" საახალწლო საჩუქრებს უგზავნის იმ კანონპროექტის მხარდამჭერ დეპუტატებს, რომლითაც ე.წ. გასაღები კვლავ შსს-ს ხელში დარჩა. ამ აქციით მათ შევახსენებთ პასუხისმგებლობას, რომელიც აიღეს ამ კანონპროექტის მხარდაჭერით. დეპუტატებს ვუგზავნით ფლეშ მეხსიერების ბარათებს, რომელსაც ერთ მხარეს აწერია "ეს შენ გეხება", მეორე მხარეს კი - "ამას მოუსმინეთ". მათ ვეუბნებით, რომ მოუსმინონ სიმღერებს და არა საკუთარ მოქალაქეებს. ასევე ვუგზავნით სტიკერებს წარწერით -"ნუ გვისმენთ", "მოუსმინეთ ხალხის ხმას". - განაცხადა საქართველოს ახალგაზრდა იურისტთა ასოციაციის თავმჯდომარე ანა ნაცვლიშვილმა.

კამპანიის „ეს შენ გეხება“-ს ერთ-ერთი წარმომადგენლის, გაზეთ "რეზონასის" მთავრი რედაქტორის, ლაშა ტუღუშის თქით, დღევანდელი საჩუქრებით დეპუტატებს შეახსენებენ, რომ ყველაფერი ახსოვთ.

"გვახსოვს კარგიც და გვახსოვს ცუდიც. მეხსიერების ბარათი სწორედ ამის გამოხატულებაა. დეპუტატებს ვეუბნებით, რომ ამ ცუდი კანონით თვითონაც არ არიან დაცულები, ეს კანონი მათაც ეხებათ და მათ ჯიბეში და სულშიც დაიწყებენ ქექვას", - განახცადა ლაშა ტუღუშმა.

კანონმდებლები დღეს მეხსიერების ბარათებს მიიღებენ, სადაც საახალწლო სიმღერებია ჩაწერილი. არასამთავრობო ორგანიზაციები კიდევ ერთხელ აღნიშნავენ, რომ პარლამენტის მიერ მიღებული კანონი დემოკრატიული ქვეყნისთვის შეუფერებელია.