რუსული მედია რუსეთსა და ოკუპირებული ცხინვალის რეგიონს შორის დაგეგმილი ახალი შეთანხმების პროექტს აქვეყნებს.

ტექსტის თანახმად, რომელიც "ვედომოსტიში" დაიბეჭდა, იგეგმება რუსეთისა და სამხრეთ ოსეთის სახელმწიფო ინსტიტუტების სრული ინტეგრაცია. გაერთიანდება რუსეთისა და ცხინვალის საოკუპაციო რეჟიმის არმია და ძალოვანი სტუქტურები, მათ შორის სპეცსამსახურები.

გარდა იმისა, რომ მხარეები ვალდებულებას იღებენ თანმიმდევრული საგარეო პოლიტიკა აწარმოონ,თავდაცვისა და უსაფრთხოების ფუნქციას მოსკოვი თავის თავზე იღებს. მათ შორის კანონიერების დაცვის , წესრიგის და საზოგადოებრივი უსაფრთხოების ჩათვლით.

სამხრეთ ოსეთის არმია და ძალოვანები გახდებიან რუსეთის ანალოგიური სტრუქტურების ნაწილი (სამხრეთ ოსეთის „კგბ“ ხდება რუსეთის „ფსბ“-ს ნაწილი), ამასთანავე საკონტრაქტო და სავალდებულო სამხედრო სამსახურს ცხინვალის რეგიონის მაცხოვრებლები საკუთარ ტერიტორიაზე გაივლიან. სამხრეთ ოსეთის შინაგან საქმეთა, საგამოძიებო და სასჯელაღსრულების ორგანოები ხდებიან რუსეთის შესაბამისი ორგანოების ნაწილი.

დაგეგმილია გამშვები პუნქტების და საბაჟო კონტროლის გაუქმება რუსეთსა და ოკუპირებულ ცხინვალს შორის, რის შედეგადაც ხალხის გადაადგილება და ტვირთის მოძრაობა თავისუფლად იქნება შესაძლებელი, საბაჟო ორგანოები რუსეთის შემადგენლობაში შევა, თუმცა გადასახადი დარჩება ცხინვალის ბიუჯეტში.

შეთანხმების თანახმად საჯარო მოხელეების ხელფასი, პენსიები და შეღავათები გაუტოლდება ჩრდილოეთ კავკასიის ფედერალური ოლქის დონეს.

მოკავშირეობისა და ინტეგრაციის შესახებ ახალი შეთანხმების გაფორმება მოსკოვსა და ცხინვალს შორის 2015 წლის დასაწყისში იგეგმება.

საოკუპაციო რეჟიმის ე.წ. პრეზიდენტის ადმინისტრაციის ხელმძღვანელის ბორის ჩოჩიევის ცნობით, შეთანხმების ტექსტმა ხელმოწერამდე შესაძლოა გარკვეული ცვლილება განიცადოს.