პარლამენტში დარგობრივი ეკონომიკის სხდომაზე, სადაც მაუწყებლობის შესახებ კანონპროექტზე მსჯელობენ, დაპირისპირება მოხდა.

უმრავლესობის წევრის გია ჟორჟოლიანის თქმით, კანონპროექტს ის ადამიანები ეწინააღმდეგებიან, ვინც წლების განმავლობაში მედიას ფეხქვეშ თელავდა. აღნიშნულმა განცხადებამ ტელეკომპანია „რუსთავი 2“-ის გენერალური დირექტორი ნიკა გვარამია გააღიზიანა. მან სთხოვა დეპუტატს დაეკონკრეტებინა თუ ვის გულისხმობდა.

გვარამიამ და ჟორჟოლიანმა სიტყვიერი დაპირისპირების შემდეგ ერთმანეთისკენ ფიზიკურადაც გაიწიეს.

„გავიგე, რომ ზრდილობა არ გაქვს. შენ ხარ უზრდელი. რა უნდა გელაპარაკო. ზუსტად „რუსთავი-2“ იყო ის ტელევიზია, რომელმაც 9 წლის მანძილზე რეჟიმი შექმნა“, - მიმართა ჟორჟოლიანმა გვარამიას.

მაუწყებლობის შესახებ კანონპროექტი სარეკლამო დროის შეზღუდვას შეეხება.