სამკერვალო ფაბრიკა „ამირანის“ აქციონერი და ყოფილი გენერალური დირექტორი, ავთანდილ კვარაცხელია, თითქმის 15 წელია, რაც საკუთარი და სააქციო საზოგადოების ქონების დასაბრუნებლად იბრძვის. ფაბრიკა ამჟამად „ქართუს“ მფლობელობაშია და კვარაცხელია ქონების წართმევაში, სწორედ, ბანკის მეპატრონეს, ბიძინა ივანიშვილის ადანაშაულებს.

„ხმამაღლა მინდა ვთქვა, რომ ივანიშვილმა საკუთარი თავიდან დაიწყო სამართლიანობის აღდგენა! ეს კაცი არის ბანდიტი და მატყუარა! მატყუარაა იმიტომ, რომ მან თქვა - მე საქართველოში არაფერი მიყიდიაო! გახსოვთ, მისი პირველი შეხვედრა ჟურნალისტებთან? მე ახლა ვეუბნები: პირველი იყიდა წყნეთის სამკერვალო ფაბრიკა 1996 წელს. დღეს წყნეთის ცენტრში ბაყაყების ჭაობია და დაკონსერვებული აქვს! შემდეგ იყიდა ფეხსაცმელების ფაბრიკა „ისანი“ დაანგრია აბსოლუტურად და იმ ტერიტორიაზე საწყობები აქვს, ათასობით მუშა დატოვა უსამსახუროდ... მესამე - მცხეთის კერამიკული ქარხანა. ჩემი ფაბრიკა „ამირანი“, რომელშიც 500 თანამშრომელი მუშაობდა. აქედან 300-ზე მეტი აქციონერი და მესაკუთრე იყო. ნახეთ დღეს რა მდგომარეობაშია.

ბანდიტია, ამდენ ხალხს კაპიკებად წაგვართვა ქონება! ხალხს ეგონა, რომ ჩემს ქონებას მივტიროდი და ამიტომ ვებრძოდი, ახლა ხომ გამოჩნდა ყველაფერი?!“- აცხადებს კვარაცხელია.

მისი თქმით ის ბიძინა ივანიშვილთან პირადად შეხვედრას ცდილობდა თუმცა ვერ მოახერხა და მცდელობა ქონდა მისთვის ხმა მისი თანაგუნდელების მეშვეობით მიეწვდინა:

„პირველად შევხვდი ეკა ბესელიას, მაგრამ ვერ შეძლო. შემდეგ შევხვდი ზაქარია ქუცნაშვილს, მომატყუა-გადავცემო. მერე მითხრა- ხომ იცი რა რეჟიმში ვართ, ცოტა დრო მომეციო, ის დროც მივეცი, მაგრამ საბოლოო ჯამში არაფერი გამოვიდა... მერე ჩემი „რესპუბლიკელი“ მეგობარი თინა ხიდაშელს დაელაპარაკა, თინა ხიდაშელმა დაიწყო ლაპარაკი და არ ალაპარაკა ივანიშვილმა. ბოლოს დათო უსუფაშვილმა თქვა - რა დევს მის თავში არ ვიცი, დავიწყე ლაპარაკი და არც მალაპარაკა, მითხრა- თქვენ საქმეს მიხედეთო“.

წყარო „ქრონიკა +“