რუსეთსა და აფხაზეთს შორის გაფორმებული ე.წ. შეთანხმება გაეროს უშიშროების საბჭოს მონაწილე ქვეყნების შემაჯამებელ სხდომაზე განიხილეს.

"ლიტვა შეშფოთებულია რუსეთის მუდმივი მცდელობებით, რომ ძირი გამოუთხაროს საქართველოს სუვერენიტეტსა და დამოუკიდებლობას. ე.წ. შეთანხმება ძირს უთხრის ყველანაირ მცდელობას, რომ მოიძებნოს კონფლიქტის გადაჭრის გზა. ის წარმოადგენს რუსეთის მიერ აფხაზეთის ანექსიისკენ გადადგმულ ნაბიჯს. არსებობს რეალური საშიშროება, რომ იგივე სცენარი გათამაშდება ცხინვალის რეგიონშიც," - ნათქვამია განცხადებაში, რომელსაც ლიტვის წამომადგენლობა ავრცელებს.

აღნიშნულ საკითხს დიდი ბრიტანეთის წარმომადგენლობაც გამოეხმაურა.

„როცა ქვეყანა ასე უხეშად არღვევს საერთაშორისო საზღვრებსა და ნორმებს მსოფლიომ პასუხი უნდა გასცეს. საბჭო უნდა იყოს ამ ნორმების დამცველი, როცა საქმე ეხება საერთაშორისო მშვიდობისა და უსაფრთხოების დაცვას, რაც გაეროს ქარტიითაა გათვალისწინებული. ე.წ. ხელშეკრულება რუსეთის მიერ მეზობლების შიდა საქმეში "სისტემატიური ჩარევის" ნაწილია", - ნათქვამია დიდი ბრიტანეთის განცხადებაში.

გაერო-ს უშიშროების საბჭოს დეკემბრის შემაჯამებელი სხდომა გუშინ გაიმართა.