"მაესტროს" გენერალურმა დირექტორმა ბაია გადაბაძემ ტელეკომპანიაში განხორციელებულ ცვლილებებთან დაკავშირებით კომენტარი „კურიერის“ ეთერში გააკეთა.

„ძალიან ვწუხვარ ყველა წასული ჟურნალისტის გამო, ისინი არიან ჩემი კოლეგები და მე ვფიქრობ ჩვენ ერთად კარგად ვმუშაობდით, მე მიმმაჩნია, რომ მათ მიიღეს წინასწარი გადაწყვეტილება, ეს ნიშნავს იმას, რომ მათ აქვთ ეჭვი, რომ ვინმე ოდესმე ჩაერევა მატ სარედაქციო დამოუკიდებლობაში, რაც არის ჩემთვის კატეგორიულად მიუღებელი, იმიტომ რომ გუშინდელ თათბირზე პირადად მე დავდექი იმის გარანტად, რომ ამაში არავინ არ ჩაერეოდა და თუკი ასეთი პრეცენდენტი იქნებოდა პირადად მე მათთან ერთად დავტოვებდი არხს, იმიტომ რომ არ მიმაჩნია, რომ ვინმეზე ნაკლები სამართლიანობის განცდა მაქვს, ან მიბრძოლია, ან დავზარალებულვარ.“- აღნიშნა ბაია გადაბაძემ .

გადაბაძის თქმით რომელიმე ჟურნალისტის კოკა ყანდიაშვილით ჩანაცვლებაზე ლაპარაკი არასწორია:

„კოკა ყანდიაშვილით ჩანაცვლებაზე ლაპარაკი არასწორად მიმაჩნია, იმიტომ რომ არავინ არავით არ ნაცვლდებოდა, კოკა შეიძლება მოსულიყო ამ არხზე, ჩვენ მასთან ვაწარმოებდით მოლაპარაკებებს დიდი ხნის განმავლობაში, მაგრამ კოკა არანაირ მონაწილეობას მენეჯმენტში არ მიიღებდა.“

არხის დირექტორის თქმით ნინო ჟიჟილაშვილი სამსახურიდან პირადად მას არ გაუთავისუფლებია:

„მე ნინო ჟიჟილაშვილი არ გამითავისუფლებია თანამდებობიდან, მე მას შევთავაზე სავარაუდო ბადე, რაც მისთვის იყო მიუღებელი. ხოლო შემდეგ რაც მოხდა მასსა და არხის დამფუძნებელს შორის, ამაზე მე კომენტარს ვერ გავაკეთებ.“- აცხადებს გადაბაძე.