ვინ მართავს ,,მაესტროს“ ,,პროქართულ იდეოლოგიას“

ვინ მართავს ,,მაესტროს“ ,,პროქართულ იდეოლოგიას“ - ჟურნალისტების პროტესტი

პოლიტიკა - 15:05, 22 Dec, 2014

2599

,,არხის ხელმძღვანელმა ბაია გადაბაძემ დაადასტურა, რომ არხმა პროქართული იდეოლოგია უნდა გაატაროს, რა დგას ამის უკან, ალბათ ვნახავთ“ - "მაესტროს" საინფორმაციოს ყოფილი პროდიუსერი სოფო ზურაბიანი ,,ნიუპოსტთან“ აცხადებს, რომ რას გულისხმობდა არხის ხელმძღვანელობა ,,პროქართულში“ ეს გაუგებარია.

,,არ ვიცი რას ნიშნავს პროქართული იდეოლოგია. ჩვენ ისედაც საზოგადოებრივი ინტერესიდან გამომდინარე ვაშუქებდით ყველა მოვლენას და ვფიქრობ, რომ ეს არის ჩემი პროქართული მოვალეობა. აქცენტი იმაზე, რომ არხმა უნდა გაატაროს რაღაც იდეოლოგია, საფუძველშივე არასწორია. შესაბამისად რას ნიშნავს და რას გულისხმობდა პროქართული არ ვიცი. რა დგას ამის უკან, ვნახავთ ალბათ, როდესაც ეს იდეოლოგია გატარდება ჩვენს გარეშე“, - აცხადებს ჟურნალისტი.

სოფო ზურაბიანი ,,ნიუპოსტთან“ იმასაც ამბობს, რომ საინფორმაციოს სამსახურის მისამართით გამოთქმული რამდენიმე შენიშვნა ეჭქვეშ აყენებს არხის დასავლურ კურსს.

,,არხის საინფორმაციო სამსახურის მისამართით გამოთქმული რამდენიმე შენიშვნა იძლევა ვარაუდის საფუძველს, რომ შესაძლებელია ეს მაინცდამაინც არ ემთხვეოდეს დასავლურ კურსს, თუმცა ამის გადაჭრით მტკიცება არ შეიძლება“, - აცხადებს სოფო ზურაბიანი.

,,ნიუპოსტი“ არხის ,,პროქართულ იდეოლოგიასთან“ დაკავშირებით ,,მაესტროს“ გენერალურ დირექტორთან დაკავშირებას შეეცადა, თუმცა ბაია გადაბაძე სატელეფონო ზარებს არ პასუხობს.

ტელეკომპანია "მაესტროზე" რეორგანიზაცია გამოცხადდა. ტელეკომპანიაში ადასტურებენ, რომ არხი დატოვა დირექტორის მოადგილემ და "ცხრიანის" წამყვანმა ნინო ჟიჟილაშვილმა. მასთან ერთად არხიდან წავიდა რამდენიმე პროდიუსერი და ჟურნალისტების ნაწილი.

„გენერალური დირექტორი ბაია გადაბაძე კიდევ ერთხელ ადასტურებს, რომ "ახალი ამბები" რჩება არხის პრიორიტეტად, რომელიც რეორგანიზაციის შემდეგ განახლებული ფორმატით და ბადით დაუბრუნდება სატელევიზიო სივრცეს", - ნათქვამია ტელეკომპანიის დირექციის მიერ გავრცელებულ განცხადებაში.