შეუძლებელია ამ განცხადების გამკეთებელი სამინისტრო იყოს დამოუკიდებელი სახელმწიფოს სახე და უსაფრთხოების გარანტი

პოლიტიკა - 22:15, 20 Dec, 2014

3586

თავდაცვის სამინისტროს მიერ დღეს გაკეთებულ განცხადებას ეხმაურება ,,ეროვნულ-დემოკრატიული“ პარტია.

,,სამწუხაროდ, უკრაინის თავისუფლებისათვის ბრძოლაში გმირულად დაეცა ქართველი ახალგაზრდა ალექსანდრე გრიგოლაშვილი. ეროვნულ-დემოკრატიული პარტია სამძიმარს უცხადებს მის ოჯახს და მთლიანად საქართველოს.

მაგრამ, დიდ ტკივილთან ერთად გეუფლება სიამაყის გრძნობა და მომავლის იმედი, რომ ქვეყანამ, რომელმაც ასეთი შვილები გაზარდა დამარცხება არ უწერია.

ამ ვითარებაში გამაოგნებელი იყო საქართველოს თავდაცვის სამინისტროს განცხადება, რომ თურმე უკრაინაში რაც ხდება, საქართველოს გარეთ მიმდინარე საბრძოლო მოქმედებებია და მეტი არაფერი, ხოლო ქართველების მხრიდან უკრაინელების მხარდაჭერა და მათთან ერთად ბრძოლა საერთო მტრის რუსეთის წინააღმდეგ - პროვოკაცია.

ჩვენ გვახსენდება პოლონეთის თავისუფლებისათვის თავდადებული ვალერიან თევზაძე და სხვა ქართველი ოფიცრები. ჩვენ გვახსენდება საფრანგეთის სიამაყე, როგორც თვითონ ფრანგები უწოდებენ დიმიტრი ამილახვარი და საფრანგეთის უცხოური ლეგიონის სხვა ქართველი მეომრები. ყველა ამ ქართველს სამართლიანად უწოდებდნენ ორი ერის გმირებს, თავისუფლების ჯვაროსნებს, რადგან წარსულში პოლონეთსა და საფრანგეთში, დღეს უკრაინაში ქართველები ამ ქვეყნებთან ერთად საკუთარი სამშობლოს თავისუფლებასა და ღირსებას იცავდნენ და იცავენ.

შეუძლებელია ასეთი განცხადების გამკეთებელი სამინისტრო იყოს დამოუკიდებელი სახელმწიფოს სახე, მითუმეტეს მისი უსაფრთხოების გარანტი.

პიროვნებებს რომელთაც არ ესმით რა არის სამხედრო ღირსება, თავისუფლება, ერთობლივი ძალისხმევა საერთო მტერთან ბრძოლაში, არ აქვთ არც მორალური და არც პოლიტიკური უფლება მართავდნენ ისეთ მნიშვნელოვან უწყებას, როგორიც თავდაცვის სამინისტროა“, - ნათქვამია პარტიის განცხადებაში.