პარლამენტმა ქალთა მიმართ ძალადობის აღმოსაფხვრელად სამუშაო ჯგუფი შექმნა

პოლიტიკა - 12:25, 20 Dec, 2014

1760

პარლამენტის ადამიანის უფლებათა დაცვის კომიტეტმა ქალთა მიმართ ძალადობის აღმოფხვრის მიზნით სამუშაო ჯგუფი შექმნა.

კომიტეტის გუშინდელ სხდომაზე ქალთა მოძრაობის წევრების მიერ მომზადებულ პეტიციაზე იმსჯელეს და სამუშაო ჯგუფი შექმნეს, სადაც სამოქალაქო სექტორის გარდა, დეპუტატები და აღმასრულებელი ხელისუფლების წარმომადგენლები შევლენ.

კომიტეტის თავმჯდომარის, ეკა ბესელიას განცხადებით, სამუშაო ჯგუფი კონკრეტული მანდატით იმუშავებს და მას ფუნქცია ექნება, რომ ქალთა მიმართ ძალადობის აღმოფხრის მიზნით, კონკრეტული ხედვები ჩამოაყლიბოს.

ბესელიას თქმით, საქართველო ამ პრობლემას უნდა გაუმკლავდეს, რომელსაც მსოფლიო ებრძვის.

კანონმდებელის განცხადებით, სამუშაო ჯგუფის ფარგლებში, სხდომაზე შსსამინისტროს და მთავარი პროკურატურის წარმომადგენლები იქნებიან მიწვეულნი, რათა გაირკვეს, ქალთა მიმართ ძალადობის აღმოფსახვრელად რამდენად ამომწურავი იყო მათ მიერ გატარებული ქმედებები.

პეტიცია-ს „ქალთა მიმართ ძალადობის აღმოსაფხვრელად’’ ხელი 6500-ზე მეტმა მოქალაქემ მოაწრა. პეტიციის ხელმომწერნი ქალზე ძალადობისა და გენდერული უთანასწორობის აღმოსაფხვრელად ხელისუფლებას ქმედითი და ეფექტური პოლიტიკის გატარებისკენ მოუწოდებენ.

არასამთავრობოები ითხოვენ, რომ საგანმანათლებლო დაწესებულებებში გენდერული თანასწორობისა და არაძალადობრივი კულტურის დანერგვის მიზნით, გენდერული თანასწორობა სკოლამდელი უნდა გახდეს და მისი დეტალური სამოქმედო გეგმა გაიწეროს. მათი წინადადებით, ფსიქო-სოციალური რეაბილიტაციის სერვისები უნდა განვითარდეს, როგორც მსხვერპლთათვის, ასევე მოძალადეთათვის.