უახლესი ტექნოლოგიებით აღჭურვილი საწარმო 10 000 კვადრატულ მეტრზე და 5 მილიონი ლარის ინვესტიცია, - საქართველოს პრემიერ-მინისტრი ირაკლი ღარიბაშვილი სამტრედიაში ხვალ შეღავათიანი აგროკრედიტის პროექტში დაფინანსებულ კიდევ ერთ სასათბურე მეურნეობას დაათვალიერებს.

“იმერეთი გრინერი” სასათბურე/სასაწყობო მეურნეობას და მაცივრებით აღჭურვილ სატრანსპორტო და სადისტრიბუციო ქსელს მოიცავს. სასათბურე მეურნეობაში სხვადასხვა სახის ბოსტნეულის მოყვანა იგეგმება, რაც ჰოლანდიელი სპეციალისტების უშუალო მეთვალყურეობის ქვეშ განხორცილედება. საწარმოს პროდუქცია სრულ შესაბამისობაში იქნება ევროპულ სტანდარტებთან, წარმოებაში ქიმიური სასუქის გამოყენება მინიმუმამდეა შემცირებული, მოსავალი ყოველდღიურად მიიღება და მომხმარებელს მიეწოდება.

საწარმოში ამ ეტაპზე 20 ადგილობრივი დასაქმდება. პროექტის განვითარების შემდგომ ეტაპზე სასათბურე მეურნეობა დამატებით 40 000 კვადრატულ მეტრ ფართობზე მოეწყობა და მთლიანობაში 100 ადგილობრივს დაასაქმებს.

საწარმოს გახსნას, პრემიერ-მინისტრ ირაკლი ღარიბაშვილთან ერთად, ვიცე-პრემიერები - ეკონომიკისა და ენერგეტიკის მინისტრები, გიორგი კვირიკაშვილი და კახა კალაძე, ნიდერლანდების სამეფოს ელჩი საქართველოში ჰანს ჰორბახი, ასევე საკანონმდებლო და ადგილობრივი ხელისუფლების წარმომადგენლები დაესწრებიან.