„არ უნდა წარმოვიდგინოთ, რომ რიგის სამიტიდან მეორე დღესვე შეგვეძლება შენგენის ქვეყნებში უვიზო მიმოსვლა“, - ამის შესახებ საგარეო საქმეთა მინისტრმა თამარ ბერუჩაშვილმა ესტონელ კოლეგასთან შეხვედრისას განაცხადა.

მისი თქმით, რიგის სამიტამდე საქართველომ უნდა მიიღოს რეკომენდაცია ევროკომისიიდან, რომ საქართველო უვიზო მიმისვლისთვის მზად არის.

როგორ ბერუჩაშვილი განმარტავს, მანამდე საქართველოს მთელი რიგი ვალდებულებების განხორციელება მოუწევს.

„ჩვენი ამოცანაა, რომ ყველა ვალდებულება და ამოცანა შესრულდეს რიგის სამიტამდე და მივიღოთ რეკომენდაცია ევროკომისიიდან, რომ საქართველო მზად არის მიიღოს უვიზო მიმოსვლა. ამას სჭირდება პოლიტიკური გადაწყვეტილება ევროკავშირის წევრი ქვეყნებისგან. არ უნდა წარმოვიდგინოთ ის, რომ რიგის სამიტის შემდეგ, ჩვენ მეორე დღესვე უკვე თავისუფლად ვიმოძრავებთ შენგენის ქვეყნებში. რიგაში ველით დადასტურებას იმისა, რომ საქართველომ ყველაფერი, რაც მასზე იყო დამოკიდებული ტექნიკური პარამეტრების გათვალისწინებით, შეასრულა", - განაცხადა ბერუჩაშვილმა.