ევროპული არჩევანი შეუქცევადია, თუმცა ევროპამ საქართველოს გამაფრთხილებელი სიგნალიც მისცა

ევროპული არჩევანი შეუქცევადია, თუმცა ევროპამ საქართველოს გამაფრთხილებელი სიგნალიც მისცა - ქარდავა

პოლიტიკა - 19:29, 18 Dec, 2014

1334

ეროვნულ-დემოკრატიული პარტიის ლიდერის ბაჩუკი ქარდავას განცხადებით ევროპარლამენტის მიერ საქართველო-ევროკავშირის ასოცირების შეთანხმების რატიფიცირება არის სიგნალი ევროპის ქვეყნების პარლამენტებისთვის, რომ საქართველოს არჩევანი არის შეუქცევადი. ქარდავას თქმით, ამის შემდეგ ევროპის ქვეყნების პარლამენტები თავიანთ ქვეყნებში ხელშეკრულების რატიფიცირების პროცესს დააჩქარებენ.

ედპ-ს თავმჯდომარე ევროპარლამენტის მიერ მიღებულ რეზოლუციასაც გამოეხმაურა და უკრაინის ფონზე საქართველოს საკითხის წინ წამოწევას მნიშვნელოვანი ფაქტი უწოდა:

„მნიშვნელოვანი დეტალი რაც იყო ამ რეზოლუციაში, ეს არის რუსეთის ქმედების დაგმობა აფხაზეთთან მიმართებაში, აქ არ არის საუბარი თუ როგორ იქცეოდა რუსეთი წარსულში საქართველოსთან , არამედ საუბარია განახლებულ აგრესიაზე და რუსეთის მხრიდან აფხაზეთის ფაქტობრივ ანექსიაზე, დღეს როდესაც უკრაინის ფონზე ევროპარლამენტი კიდევ ერთხელ ამახვილებს საქართველოს საკითხზე ყურადღებას, ეს ძალიან მნიშვნელოვანია.“- აცხადებს ქარდავა.

ქარდავამ რეზოულიციის იმ ნაწილზეც გაამახვილა ყურადღება, სადაც სასამართლოს დამოუკიდებლობაზეა საუბარი. ედპ-ს ლიდერი ამბობს, რომ ქვეყანაში შერჩევითი სამართლის არსებობა ევროპულ გზაზე შემაფერხებელი ფაქტორია, რაზეც მითითება ევროპელი კოლეგების მხრიდან იქნა გაკეთებული.

,,უნდა გვესმოდეს, რომ ამ რეზოლუციით, ევროპარლამენტმა საქართველოს ხელისუფლებას კიდევ ერთხელ მისცა გამაფრთხილებელი სიგნალი, რომ საქართველოს ევროპული არჩევანი პირდაპირ კავშირშია ქვეყნის საშინაო პოლიტიკასა და დემოკრატიული ინსტიტუტების განვითარებასთან. ის ფაქტი, რომ ხელისუფლება ძალისმიერ სტრუქტურებს და კერძოდ პროკურატურას პოლიტიკური დევნის იაღად იყენებს, არის შემაფერხებელი ფაქტორი საქართველოს დასავლური მისწარფებებისთვის, რას მკაფიოდ ჩანს ამ რეზოლუციაში“, - განაცხადა ბაჩუკი ქარდავამ.