სოხუმში რუსული ბიზნესი იხურება - ,,აფხაზეთი არ უნდა ცხოვრობდეს რუსეთის იმედად“

პოლიტიკა - 21:49, 17 Dec, 2014

3959

მარტო დღეს საღამოს, 20:00 საათზე სოხუმის ცენტრში აქციის ფონზე დაიხურა 11-მდე უცხოური ბრენდის მაღაზია, რომელიც რუს ბიზინესმენებს უკვე ოთხი წელია აქვთ გახსნილი. გარდა მაღაზიებისა, რუს ოლიგარქებს ტურისტული კომპანიები და ქართველების საცხოვრებელ სახლებში სასტუმროები ჰქონდათ გახსნილი იქ ჩასული სტუმრების მომსახურებისათვის.

რუსული რუბლის გაუფასურებასთან დაკავშირებით, რუსი ბიზინესმენები იძულებული გახდნენ 11-ვე მაღაზია დაეხურათ. მაღაზიებზე აბრებიც კი არის გაკრული შემდეგი შინაარსით, რომ ისინი დაიხურა რუსეთში შექმნილი ეკონომიკური კრიზისის გამო. სოხუმის ცენტრში მაღაზიების დახურვის აქციაზე მისული რუსეთის მოქალაქეები აცხადებდნენ, რომ წელს არც ციტრუსის გატანას აქვს აზრი და ფსოუზეც იკლო პროდუქტების რაოდენობამ. ისინი აფხაზეთში ყიდულობენ პროდუქტს და რუსეთში აგზავნიან, რადგან იქ პროდუქტი საგრძნობლად გაძვირდა.

დღევანდელ აქციაზე მისული იყო ხაჯიმბას კონკურენტი ე.წ. საპრეზიდენტო არჩევნებში ასლან ბჟანია, რომელმაც აღნიშნა, რომ აფხაზეთში შეჩერებულია ყველა იმ სახლის მშენებლობა, რომელიც რუსებს ჰქონდათ დაგეგმილი, მათ შორის საზაფხულო კოტეჯები რიწის ტბაზე და ახალ ათონში. როგორც ბჟანიამ აღნიშნა, აფხაზეთი არ უნდა ცხოვრობდეს რუსეთის იმედად. მან რუსეთში შექმნილ ვითარებას აფხაზეთისთვის რეალური საშიშროება უწოდა.