დევნილთა მინისტრმა სოზარ სუბარმა პარლამენტის ეროვნულ ბიბლიოთეკაში სამინისტროს ორი წლის მუშაობის ანგარიში წარადგინა.

სუბარის თქმით, დევნილთა პრობლემების გადაწყვეტის კუთხით, ძალიან შთამბეჭდავი და დინამიური ორი წელი იყო.

მინისტრის განცხადებით, ბოლო ორი წლის განმავლობაში ხუთი ათასზე მეტ დევნილს ბინები საკუთრებაში გადაეცათ.

სუბარი თანამშრომლების დაკავების საკითხსაც გამოეხმაურა და განაცხადა, რომ ეს პირები თვითონვე დაითხოვა, შიდა აუდიტის დასკვნების საფუძველზე, რადგან უხარისხო მშენებლობის ჩაბარებაზე მოაწერეს ხელი.

"არც ერთი ობიექტი, რომელიც სტანდარტს არ შეესაბამება, არ იქნება ჩაბარებული, სულ რომ ამის გამო ბიუჯეტი ჩავარდეს და შესრულება არ მოხდეს. რაც შეეხება ბიუჯეტის შესრულებას, ამ წუთისთვის, საკასო შესრულება, ანუ უკვე გადარიცხულია ბიუჯეტის 85%, აღებული ვალდებულებებია 90%-იანი შესრულება, ხოლო კვირის ბოლომდე ჩვენ გვაქვს გარანტია, რომ შესრულება მიუახლოვდება 100%-ს", -განაცხადა სოზარ სუბარმა.

პრეზენტაციას დაესწრნენ საქართველოს მთავრობის, საკანონმდებლო ორგანოს, დიპლომატიური კორპუსის, საერთაშორისო და ადგილობრივი არასამთავრობო ორგანიზაციების წარმომადგენლები.