საპარლამენტო უმრავლესობის წევრი, გია ვოლსკი აცხადებს, რომ ევროპარლამენტში საქართველო-ევროკავშირს შორის გაფორმებული ასოცირების შეთანხმების რატიფიცირება საპარლამენტო ღონისძიებაა და სამთავრობო სტრუქტურების დასწრებას არ ითვალისწინებს.

„ეს საპრალმენტო ღონისძიებაა და სამთავრობო სტრუქტურების დასწრებას არ ითვალისწინებს. სამწუხაროდ, პარლამენტის თავმჯდომარეს დაგეგმილი ჰქონდა შეხვედრა და ის ვერ შედგება. დღემდე დარწმუნებული ვიყავით, რომ ის მოაგვარებდა პრობლემას ჯანმრთელობასთან დაკავშირებით. თედო ჯაფარიძე, საგარეო ურთიერთობათა კომიტეტის თავმჯდომარე და ევროპასთან ინტეგრაციის კომიტეტის თავმჯდომარე ვიქტორ დოლიძე იქნებიან წარმოდგენილი ევროპარლამენტში. იქ იქნება ასევე, ჩვენი სრულუფლებიანი ელჩიც“, - განაცხადა ვოლსკიმ.

გია ვოლსკი ასევე ეხმიანება საქართველოს მესამე პრეზიდენტის მიხეილ სააკაშვილის დასწრებას ევროპარლამენტში რატიფიცირებაზე და იგი აღნიშნავს, რომ სააკაშვილის ადგილი მოქალაქეთა სექციაში იქნება განსაზღვრული.

„რაც შეეხება მიხეილ სააკაშვილის მიწვევას, ასე გადაწყვიტა ჩემმა მოგვარემ „სახალხო პარტიის“ ერთ-ერთმა ლიდერმა. მათ აქვთ ამის უფლება, თუმცა დასწრების ადგილი არის ჩვეულებრივი მოქალაქის სექციაში. ვნახოთ, თვითონ თუ მოინდომებს. უსიამოვნოა, როცა ადამიანი, რომელიც ევროპული ფასეულობებისგან შორს დგას, ასეთ ღონისძიებაზეა მიწვეული“, - განაცხადა ვოლსკიმ.