საპარლამენტო უმრავლესობის წევრი ეკა ბესელია არ გამორიცხავს, რომ ევროპარლამენტის მიერ საქართველოსთან დაკავშირებით მომზადებულ რეზოლუციის პროექტში კრიტიკული მოსაზრებებიც შევიდეს.

მისი თქმით, შესაძლოა ამის მცდელობა ევროპის სახალხო პარტიას ჰქონდეს.

„რეზოლუციის მიმართ მაქვს მოლოდინი, რომ იმ პოზიტიური ნაწილის პარალელურად, იქნება გარკვეული რეკომენდაციებიც. მაქვს მოლოდინი, რომ მოხდება მიმდინარე რეფორმების ჯანსაღი და ობიექტური შეფასება, რომელიც ხდება დემოკრატიის, ადამიანის უფლებათა კუთხით. არ გამოვრიცხავ, რომ სახალხო პარტიას მცდელობა ჰქონდეს, რომ რეზოლუციის პროექტში შეტანილი იყოს კრიტიკული მოსაზრებებიც“, - აცხადებს ბესელია.

ევროპარლამენტი საქართველოს ევროკავშირთან ასოცირების ხელშეკრულების რატიფიკაციას 17 დეკემბერს მოახდენს. რატიფიცირების წინ 17 დეკემბერს სატრაბურგში დებატები გაიმართება, სადაც საქართველოს დემოკრატიული განვითარების შესახებ შედგება დისკუსია.