საქართველოს რეგიონული განვითარებისა და ინფრასტრუქტურის სამინისტროსა და ევროკავშირის ორგანიზებით კონფერენცია „2015-2017 წლის საქართველოს რეგიონული განვითარების პროგრამა-სამომავლო პერსპექტივები“ გაიმართა, რომელიც საქართველოს რეგიონული განვითარებისა და ინფრასტრუქტურის მინისტრმა დავით შავლიაშვილმა გახსნა.

კონფერენციაზე საქართველოს რეგიონების ფინანსური და ინსტიტუციური შესაძლებლობების გაზრდის საკითხებზე, არსებული ეკონომიკური უთანასწორობის შემცირების, ასევე კონკურენტუნარიანობის ამაღლების შესახებ იმსჯელეს. რეგიონული პოლიტიკის ახალი ფაზის გამოწვევებისა და შესაძლებლობების თაობაზე დისკუსიაც მოეწყო. საქართველოს მთავრობამ 2015-2017 წლებისთვის რეგიონული განვითარების პროგრამა წარმოადგინა. ის ევროკავშირის თანმიმდევრულობის პოლიტიკის პრინციპებს ეფუძნება, რომელიც ევროკავშირის ერთ-ერთ მნიშვნელოვან პოლიტიკას წარმოადგენს. პროგრამის მიზანს მთალი ქვეყნის მასშტაბით, დაბალანსებული და მდგრადი სოციალურ-ეკონომიკური განვითარების უზრუნველყოფა წარმოადგენს. განსაკუთრებული ყურადღება კი, თბილისსა და ქვეყნის დანარჩენ რეგიონებს, ასევე დედაქალაქის გარეთ მდებარე სასოფლო-ურბანულ დანაყოფებს შორის არსებული უთანასწორობების აღმოფხვრას ეთმობა.

აღნიშნული პროგრამა პირველია აღმოსავლეთ პარტნიორობის ქვეყნებს შორის და იგი ევროკავშირში გავრცელებული პროგრამის შემუშავების პრაქტიკას მოიცავს, რომელიც მოდელი იქნება სხვა ქვეყნებისთვის. მხარდაჭერის ნიშნად ევროკავშირმა უკვე უზრუნველყო 30 მლნ ევროს გამოყოფა მომდევნო ორი წლის განმავლობაში, რათა საქართველოს მთავრობას მის განხორციელებაში დაეხმაროს.

„2015-2017 წლების საქართველოს რეგიონული განვითარების პროგრამა“ საქართველოს მთავრობამ 2014 წლის 9 ივლისს დაამტკიცა. დოკუმენტი საქართველოს რეგიონული განვითარებისა და ინფრასტრუქტურის სამინისტრომ სხვა უწყებებთან კოორდინაციით მოამზადა. პროგრამა საქართველოს რეგიონული პოლიტიკის ძირითად მიზნებსა და ამოცანებს, შესაბამის პრიორიტეტებსა და ღონისძიებებს განსაზღვრავს. ის ასევე ადგენს საჭირო პირობებს ქვეყნის რეგიონების დაბალანსებული და მდგრადი სოციალ-ეკონომიკური განვითარების სისტემური ხელშეწყობისთვის, შემდეგი 3 წლის განმავლობაში.

კონფერენციაში საქართველოს ვიცეპრემიერი კახი კალაძე, საქართველოს საგარეო საქმეთა მინისტრი თამარ ბერუჩაშვილი, სოფლის მეურნეობის მინისტრი ოთარ დანელია, ვროკავშირის დელეგაციის ხელმძღვანელი საქართველოში იანოშ ჰერმანი და სხვა ოფიციალური პირები მონაწილეობდნენ.