მთავრობის ადმინისტრაცია დონორ ქვეყნებთან და ორგანიზაციებთან თანამშრომლობის მექანიზმებს აძლიერებს

პოლიტიკა - 11:33, 13 Dec, 2014

1472

2015 წელი - ახალი ეტაპი დონორებთან თანამშრომლობისთვის, - საქართველოს მთავრობის ადმინისტრაცია დონორ ქვეყნებთან და ორგანიზაციებთან უფრო მჭიდრო პარტნიორობის დასამყარებლად მთავრობის თანამშრომლობის მექანიზმებს აძლიერებს. პოლიტიკის ანალიზის, სტრატეგიული დაგეგმვისა და კოორდინაციის კუთხით, საქართველოს მთავრობის ადმინისტრაციასთან აქტიურად თანამშრომლობს მაღალი დონის მრჩეველი, ჰოლანდიის მინისტრთა კაბინეტის ყოფილი წევრი და მსოფლიო ბანკისა და გაეროს მაღალჩინოსანი ედ მელკერტი.

როგორც ედ მელკერტმა მთავრობის ადმინისტრაციის ხელმძღვანელობასთან შეხვედრების შემდეგ განაცხადა, გაძლიერებული მექანიზმები, საქართველოს მთავრობას, პრემიერ-მინისტრის მეთაურობით, საშუალებას მისცემს, საერთაშორისო შეთანხმებების გათვალისწინებით განსაზღვროს ის პრიორიტეტული მიმართულებები, სადაც დონორი ქვეყნებისა და მრავალმხრივი ორგანიზაციების მხარდაჭერა კიდევ უფრო მნიშვნელოვანია.
ედ მელკერტი მნიშვნელოვნად მიიჩნევს საქართველოს მთავრობის მტკიცე გადაწყვეტილებას, კიდევ უფრო ეფექტურად მიმართოს მეგობარ ქვეყანათა და დონორთა დახმარება ქვეყნის ინტერესებისა და ხალხის სასარგებლოდ.
„ეს საჭიროებს სამინისტროების ეფექტიან კოორდინაციას პრემიერ-მინისტრის დავალებით, ხოლო დონორების მხრიდან - სრულ მზაობას, დაეყრდნონ საქართველოს მთავრობის პრიორიტეტებს",- განაცხადა მელკერტმა.
ედ მელკერტი დარწმუნებულია, რომ 2015 წელი საქართველოს მთავრობის მხრიდან დონორებთან თანამშრომლობის კიდევ უფრო გაღრმავებისთვის ახალი ეტაპი იქნება და იმედოვნებს, რომ საქართველოს მთავრობა სამუშაო პროცედურების ნაწილზე მუშაობას უახლოეს მომავალში დაასრულებს.
დონორების კოორდინაციას მთავრობის ადმინისტრაციაში შექმნილი პოლიტიკის ანალიზის, სტრატეგიული დაგეგმვისა და კოორდინაციის დეპარტამენტი უზრუნველყოფს.