ადვოკატთა ასოციაციის თავმჯდომარემ, ზაზა ხატიაშვილმა, ეუთოს დასკვნის შეფასებისას განაცხადა, რომ - „ODIHR-ის დასკვნაში ასახულია რეალობა და ეს რეალობა ბიძინა ივანიშვილის ნების შემთხვევაში გამოსწორდება“.

ხატიაშვილის თქმით დასკვნაში მოყვანილი რეკომენდაციების შესრულება, სწორედ ბიძინა ივანიშვილზეა დამოკიდებული, რადგან თუ ODIHR-ის რომელიმე რეკომენდაცია, მოეწონება ივანიშვილს, ის გასცემს ბრძანებას და პარლამენტიც შეასრულებს ამ რეკომენდაციებს.

"თუ ბიძინა ივანიშვილს მოეწონება ამ დასკვნაში რომელიმე რეკომენდაცია, გასცემს ბრძანებას და პარლამენტი გამოასწორებს. მახსენდება ძალიან კარგი ფილმი "ნათლიმამა". მარლონ ბრანდო თამაშობდა ნათლიმამის როლს, ბიძინა ივანიშვილს კი ამ როლის თამაში არ გამოდის. წლების მანძილზე ხდებოდა ზეწოლა სასამართლოზე და ეს ტენდენცია გრძელდება. ხშირად ვუსმენ ხელისუფლების წარმომადგენლების განცხადებებს, რომ ზეწოლა მოიხსნა. თუმცა, როდესაც ადვოკატებს არ აძლევენ სისხლის სამართლის მასალებს და შემდეგ ამ მასალებს, რომელსაც გრიფით საიდუმლო ადევს, იხილავენ მთავრობის სხდომაზე და საპარლამენტო უმრავლესობის ლიდერი დავით საგანალიძე ასკვნის არის თუ არა დანაშაულის ნიშნები ამ საქმეში, ეს არის ზეწოლა როგორც სასამართლოზე ასევე პროკურატურაზე. მეორე მომენტია, რომ პირი ჯერ არ დაუკავებიათ და ხელისუფლების წარმომადგენლები გამოდიან და აცხადებენ, რომ მან ჩაიდინა დანაშაული. ეს მოსამართლისთვის არის მესიჯი, რომ მან ეს ადამიანი რადაც არ უნდა დაუჯდეს, უნდა გაამტყუნოს. ასეთმა დაუფიქრებელმა განცხადებებმა გამოიწვია ეს დასკვნა. თვითონ სასამართლოში გამოჯანსაღდა მდგომარეობა. გამამართლებელი განაჩენის რიცხვი 300-400%-ით გაიზარდა. გამოჩნდნენ მოსამართლეები, რომლებიც არ ასრულებენ სახელმწიფოსა და პროკურატურის დავალებებს", - განაცხადა ზაზა ხატიაშვილმა.