საქართველოს ექსპრეზიდენტის მიხეილ სააკაშვილის და ყოფილი მაღალჩინოსნების წინააღმდეგ პროკურატურაში სარჩელი შევიდა.

ამის შესახებ „ნიუპოსტს“ სარჩელის ავტორმა, სავაჭრო პალატის ვიცეპრეზიდენტმა ლეონარდო დევდარიანმა განუცხადა.

ის ყოფილ მაღალჩინოსნებს ახალგორის გაყიდვაში და სახელმწიფოს ღალატში ადანაშაულებს.

„მე პროკურატურაში დავაყენე საკითხი თარგამაძის, სააკაშვილის და მათი ხროვის წინააღმდეგ. ისინი 2008 წლის ომის დროს სახელმწიფო ღალატში დავადანაშაულე. საგამოძიებო უწყებაში სარჩელი დღეს შევიტანე. მათი დანაშაულია ახალგორის გაყიდვა და ბიზნესის გაკეთება საქართველოს ტერიტორიისა და გაუბედურებული მოსახლეობის ხარჯზე“, - განაცხადა დევდარიანმა.

ის ასევე „ნაციონალური მოძრაობის“ წევრს გივი თარგამაძეს ცილისწამების გამო სთხოვს პასუხს. საუბარია დეპუტატის მიერ გადაცემა „არჩევანში“ გაკეთებულ განცხადებაში, სადაც თარგამაძემ ლეონარდო დევდარიანი „ეფესბეს“ აგენტად მოიხსენია და თქვა, რომ მას ირაკლი ღარიბაშვილი მფარველობს.

„ასევე, ამ განცხადების გამოც ვუჩივლებ გივი თარგამაძეს, ეს ყველაფერი სარჩელში წერია. მოვითხოვე პასუხი ცილისწამებასა და სახელმწიფო ღალატზე. ეს არის შურისძიება ჩემზე, რადგან მე 2008 წელს მათი ღალატის შესახებ ვთქვი და ეს საკითხი დავაყენე. ირაკლი ღარიბაშვილს საერთოდ არ ვიცნობ, ვიცნობ ტელევიზიიდან. რაც შეეხება ბესიკ დევდარიანზე გაკეთებულ განცხადებას გეტყვით, რომ ბატონი ბესიჯი ჩემი ძმიშვილი არ არის, ჩემი ნათესავია. გივი თარგამაძე არის შეურაცხადი და შეურაცხადი ადამიანის ბოდვას რა უნდა ვუპასუხო“, - ამბობს დევდარიანი.