თამარ ბერუჩაშვილი თურქეთის პრეზიდენტს შეხვდა

პოლიტიკა - 11:52, 10 Dec, 2014

1123

საქართველოს საგარეო საქმეთა მინისტრი თურქეთის რესპუბლიკაში ოფიციალური ვიზიტით იმყოფება,საქართველოს საგარეო საქმეთა მინისტრმა თამარ ბერუჩაშვილმა ვიზიტის ფარგლებში შეხვედრა გამართა თურქეთის რესპუბლიკის პრეზიდენტთან რეჯეფ ტაიპ ერდოღანთან.

შეხვედრაზე ორ ქვეყანას შორის არსებულ სტრატეგიულ ურთიერთობაზე და მისი შემდგომი გაღრმავების მნიშვნელობაზე ისაუბრეს. მხარეები მიესალმნენ ქვეყნებს შორის უმაღლესი სტრატეგიული თანამშრომლობის საბჭოს შექმნას, რომლის პირველი სხდომაც მომავალი წლის პირველ ნახევარში გაიმართება და მას თურქეთისა და საქართველოს პრემიერ-მინისტრები უხელმძღვანელბენ.

საუბარი შეეხო რეგიონული მასშტაბის ენერგეტიკულ პროექტებს, აღინიშნა, როგორც მათი წარმატებით გაგრძელების, ასევე ამ მიმართულებით დამატებითი პოტენციალის მოძიების მნიშვნელობა. როგორც მხარეებმა აღნიშნეს ერთობლივი ეკონომიკური-ენერგეტიკული პროექტები მნიშვნელოვანია არა მხოლოდ ორი ქვეყნის ურთიერთობისთვის, არამედ რეგიონის განვითარებისთვის.

თურქეთის რესპუბლიკის პრეზიდენტის მხრიდან აღინიშნა საქართველოს ტერიტორიული მთლიანობისა და სუვერენიტეტის მხარდაჭერა. ისევე როგორც თურქეთის ურყევი მხარდაჭერა საქართველოს ევრო-ატლანტიკურ სტრუქტურებში ინტეგრაციის მიმართულებით.

თამარ ბერუჩაშვილმა თურქეთში, საქართველოს საელჩოში, საქართველოში აკრედიტებულ ელჩებთანაც გამართა შეხვედრა, რომელსაც 20-მდე არარეზიდენტი ელჩი, ასევე თურქეთის რესპუბლიკაში საქართველოს ელჩი ირაკლი კოპლატაძე და საქართველოში თურქეთის რესპუბლიკის ელჩი ლევენთ გუმრუქჩუ ესწრებოდნენ.
შეხვედრაზე მინისტრმა ელჩებს საქართველოში მიმდინარე პროცესებზე, საგარეო პოლიტიკის პრიორიტეტებზე, ქვეყნის ევროინტეგრაციის დღის წესრიგზე მიაწოდა ინფორმაცია.
მინისტრმა, ბოლო პერიოდში ოკუპირებულ რეგიონებში განვითარებულ პროცესებზე და რუსეთის ფედერაციის ქმედებებზე ისაუბრა.
თამარ ბერუჩაშვილმა მადლობა გადაუხადა სხვადასხვა ქვეყნის დიპლომატებს საერთაშორისო ფორუმებსა და ფორმატებში საქართველოს აქტიური მხარდაჭერისთვის და ამ ქვეყნებთან თანამშრომლობის შემდგომი გაღრმავების სურვილი გამოთქვა.