მისი თქმით ჩეჩენი მებრძოლების ერთი ჯგუფი, რომლის შემადგენლობაში სავარაუდოდ , რუსეთის „ფსბ“-ს აგენტი იყო, დაჟინებით ითხოვდა დერეფნის გახსნას და ჩეჩნეთში გადასვლას. ჯგუფმა მოძრაობა დაიწყო ლოპოტას ხეობისკენ და თავი მოიყარა ლაფანყურში. ლორთქიფანიძის და ამირიძის მოლაპარაკებები უშედეგო გამოდგა, პარალელურად ინფორმაციამ გაჟონა, რადგან ჩეჩენმა მებრძოლებმა მძევლად აიყვნეს ადამიანთა ჯგუფი, რომლებსაც ხეობაში წააწყდნენ. მძევლების მშობლებმა პანიკა ატეხეს, სამართალდამცველ ორგანოებს და ჟურნალისტებს მიმართეს. „კუდის“ ყოფილი მაღალჩინოსნის თქმით სწორედ მძევლების ეპიზოდის მერე იგებს ბაჩანა ახალაია, რომ ხეობაში შეიარაღებული ჯგუფი გადაადგილდება.

ვანო მერაბიშვილი, როგორც პრემიერ მინისტრი, ქმნის კრიზისების მართვის საბჭოს. რომლის შემადგენლობაშია: შსს-ს მინისტრი ბაჩო ახალაია, მინისტრის მოადგილე გია ლორთქიფანიძე, იუსტიციის მინისტრი ზურაბ ადეიშვილი და თავდაცვის მინისტრი დიმიტრი შაშკინი. პირველი სხდომა თბილისში კანცელარიაში გაიმართა, სადაც მერაბიშვილი იძულებული გახდა ახალაიასთვის ნაწილობრივ სიმართლე ეთქვა და მას სპეცოპერაციის დაწყება მოსთხოვა. ახალაიამ უარი თქვა სპეცოპერაციაზე და საბჭოს სხდომიდან პირდაპირ ლაფანყურში ჩავიდა ანტიტერორისტული ცენტრის ხელმძღვანელ ზურაბ მაისურაძესთან ერთად. ახალაია მაისურაძის დახმარებით ცდილობდა ლოპოტის ხეობაში დაბანაკებულ „ბოევიკებთან“ მოლაპარაკებები ეწარმოებინა, რათა მათ გაეთავისუფლებინათ მძევლები და არ გადაადგილებულიყვნენ რუსეთ-საქართველოს საზღვრისკენ.

ვანო მერაბიშვილი კრიზისების მართვის საბჭოს მეორე სხდომას თელავში მართავს, რომელსაც უკვე აღარ ესწრებიან ბაჩო ახალაია და ზურაბ ადეიშვილი. ადეიშვილის თქმით ეს მისი კომპეტენცია არ არის, ხოლო ახალაია მოლაპარაკებების შედეგებს ლაფანყურში ელოდება. საბჭოს სხდომას ესწრებოდა გენშტაბის უფროსი დევი ჭანკოტაძეც, რომელიც სპეცოპერაციის წინააღმდეგი იყო.

ახმედ ჩატაევი მომლაპარაკებელთა ჯგუფშია, ის ზურაბ მაისურაძესთან, სანდრო ამირიძესთან და ზელიმხან ხანგოშვილთან ერთად მიდის ბანაკში, სადაც მას ჩეჩნები ეუბნებიან , რომ მხოლოდ ერთი პირობა აქვთ- გაუხსნან დერეფანი და გადაიყვანონ საზღვარზე.იარაღს არ დაყრიან. თუ ეს პირობა არ შესრულდება, მაშინ დამოუკიდებლად შეეცდებიან საზღვარზე გადასვლას.

ბანაკის დისლოკაციის ადგილას არც მობილური ტელეფონები მუშაობს და არც რაცია, ამირიძე ითხოვს , გააყოლონ მას ორი ჩეჩენი, დაახლოებით ერთი კილომეტრის მანძილზე , სადაც უკვე რაცია მუშაობს. მას რაციაში ეუბნებიან, რომ ადგილს დროზე გაეცალოს, რადგამ ჩეჩენი „ბოევიკების“ გასანეიტრალებლად სპეცოპერაცია იწყება.

სპეცოპერაცია ლორთქიფანიძის დავალებით იწყება, სწორედ ამ დროს იგებს ბაჩო ახალაია ამ ფაქტს, ის ხვდება, რომ ეს მახეა, სასწრაფოდ უკავშირდება მიხეილ სააკაშვილს, ტოვებს ლაფანყურს, გადადის თელავში და იქ ხვდება პრეზიდენტს.

გია ლორთქიფანიძე სპეცრაზმისა და ანტიტერორისტული ცენტრის კურატორი და მინისტრის მოადგილე იყო ამიტომ არავის აზრად არ მოუვიდოდა ლორთქიფანიძის მიერ მიღებული ბრძანების რევიზია.

„კუდის“ სპეცოპერაციების ცენტრის დანაყოფის ოცეულის ლაფანყურის სპეცოპერაციაში მონაწილეობის შესახებ „კუდის“ უფროსმა ლევან ქარდავამ და მისმა მოადგილემ ვაჟა ლელუაშვილმა ტელევიზიებით შეიტყვეს.

წყარო "ქრონიკა+"