საქართველოს პრეზიდენტი მიიჩნევს, რომ პოლიტიკური გადაწყვეტილების მიღების პროცესში, ქალთა ჩართვის გაზრდა, იქნება ერთ-ერთი პასუხი, სუსტი სქესის წარმომადგენელთა მიმართ არსებული ძალადობის აღმოსაფხვრელად .

ამის შესახებ გიორგი მარგველაშვილმა სასტუმრო „რედისონში“, NDI-ს მიერ ორგანიზებულ კონფერენციაზე, „გავიმარჯვოთ ქალებთან ერთად“ სიტყვით გამოსვლისას განაცხადა.

„არის კიდევ ერთი მომენტი, რომელიც, ჩვენთვის, ყველასთვის გახდა ნათელი წელს, ეს არის ძალადობა, რომელიც შოკივით დადგა ჩვენი საზოგადოების წინაშე, რა კალეიდოსკოპური ვითარება და ტრაგედიებიც განვითარდა. საზოგადოება ფიქრობდა პრობლემის გადაჭრის გზებზე. ჩვენ აღმოვჩნდით ის საზოგადოება, რომელიც ასე ძალადობს სუსტი სქესის წარმომადგენლებზე. ერთ-ერთი პასუხი არის სწორედ პოლიტიკური მონაწილეობის გზით ამ პრობლემის მოგვარება. თუ გავზრდით ქალთა მონაწილეობას და ჩართვას პოლიტიკური გადაწყვეტილების მიღების პროცესში, იმედია, რომ დიდი ნაბიჯები გადაიდგმება წინ,“ - განაცხადა მარგველაშვილმა.