ჟენევაში დღეს მოლაპარაკებების 30 - ე რაუნდი გაიმართება. ქართულ დელეგაციას საგარეო საქმეთა მინისტრის პირველი მოადგილე დავით დონდუა უხელმძღვანელებს. ოფიციალური თბილისი შეხვედრაზე რუსეთსა და აფხაზეთს შორის გაფორმებულ ე.წ. დოკუმენტზე ყურადღების გამახვილებას აპირებს.

დავით დონდუას თქმით, მოლაპარაკებები საკმაოდ რთული იქნება, რადგან ე.წ. დოკუმენტის გაფორმებით რუსეთმა ახალი რეალობა შექმნა.

„ის მასშტაბური წვრთნები, რომელიც სამხრეთ ოსეთის ტერიტორიაზე მიმდინარეობს, ეს არ არის ე.წ. ოსური შენაერთები, ეს არის რუსული მანევრები და იქ ისინი არიან პასუხისმგებელი უსაფრთხოებაზე. ამ მოლაპარაკებებში ქართული მხარე ყოველთვის იჩენდა კონსტრუქციულობას და ამას ჩვენს გავაგრძელებთ და ვეცდებით, რომ ეს ფორმატი შედეგზე ორიენტირებული იყოს“, - განაცხადა დავით დონდუამ.