საქართველოს საგარეო უწყების ხელმძღვანელის განცხადებით, ქართული მხარე ოკუპირებულ აფხაზეთსა და რუსეთს შორის გაფორმებულ ე.წ. ხელშეკრულებაზე სასაუბროდ ყველა ფორმატს გამოიყენებს, - ამის შესახებ თამარ ბერუჩაშვილმა საქართველოში ვიზიტად მყოფ გერმანელ კოლეგასთან ფრანკ ვალტერ შტაინმაიერთან შეხვედრის შემდეგ გამართულ ერთობლივ პრესკონფერენციაზე განაცხადა.

ბერუჩაშვილის განცხადებით, ქართულმა მხარემ ამ მიმართულებით მუშაობა მანამ დაიწყო, სანამ ეს ე.წ. ხელშეკრულება გაფორმდებოდა.

"ჩვენ მუშაობა დავიწყეთ მანამ, სანამ გაფორმდებოდა ე.წ. ხელშეკრულება, როდესაც იყო ამის შესახებ პირველი სიგნალები, რათა მოგვეხდინა მაქსიმალური მობილიზება საერთაშორისო თანამეგობრობის და მიგვეწვდინა მაქსიმალურად, დეტალურად იმ საფრთხეების შესახებ ინფორმაცია, რომელსაც ეს სიახლე იწვევს არა მარტო ოკუპირებულ ტერიტორიებთან დაკავშირებით, არამედ ზოგადად, როგორც რუსეთის კიდევ ერთი სერიოზული მცდელობა, თავის სამეზობლოში საერთაშორისო ნორმების დარღვევით ხელყოს ევროპის უსაფრთხოების არქიტექტურა", - განაცხადა თამარ ბერუჩაშვილმა.

ბერუჩაშვილის თქმით შეხვედრაზე განსაკუთრებული ყურადღება დაეთმო რუსეთის ფედერაციის მიერ ბოლო დროს განხორციელებულ ქმედებებს, რაც ხელყოფს საქართველოს სუვერენიტეტსა და ტერიტორიულ მთლიანობას და უხეშად არღვევს საერთაშორისო სამართლის ფუნდამენტურ პრინციპებს და ხაზი გაესვა დასავლეთის მხრიდან, მოვლენების შემდგომი ესკალაციის თავიდან აცილების მიზნით, რუსეთის ფედერაციის ქმედებების პოლიტიკური და სამართლებრივი შეფასებისა და სათანადო რეაგირების აუცილებლობას და, ამ კუთხით, გერმანიის საგანგებო როლს.

თამარ ბერუჩაშვილმა ყურადღება გაამახვილა გერმანიის ფედერალური მთავრობის წვლილზე საქართველოს განათლებისა და მეცნიერების განვითარების საქმეში. ასევე აღინიშნა თბილისში გერმანული საერთაშორისო სკოლის მშენებლობასთან დაკავშირებული სამართლებრივი პროცედურების დასრულების მნიშვნელობა.