„ნაციონალური მოძრაობის" ერთ-ერთი ლიდერის გიგა ბოკერიას თქმით, საქართველოს მთავრობამ უნდა იმუშაოს იმისთვის, რომ ჟენევის ფორმატი რუსეთის ფედერაციაზე ზეწოლის ინსტრუმენტი იყოს.

მისი თქმით, ქვეყნისთვის ჟენევის ფორმატის შენარჩუნება მნიშვნელოვანია.

„არც ერთი კარგი ფორმატი არ არის არაფრის მომტანი თუ მთავრობა არ არის მოწადინებული, არ არის ფორმაში და არ აქვს ხედვა, თუ როგორ უნდა აწარმოოს მოლაპარაკებები. ჩვენი მთავრობის ამოცანა უნდა იყოს, რომ იმუშავოს ყველა პარტნიორთან, რათა ჟენევის ფორმატი იყოს ზეწოლის ინსტრუმენტი რუსეთის ფედერაციაზე და არა პირიქით. დღის წესრიგში ის კი არ უნდა იდგეს, რომ საქართველო ვითომ რაღაც დოკუმენტს ბლოკავს, რომელიც თანათავმჯდომარეებმა მოამზადეს, პირიქით, რუსეთი უნდა იყოს წნეხის ქვეშ, რაც არის ნაწილი გრძელვადიანი სტრატეგიის და საბოლოო ჯამში, უნდა გადავწყვიტოთ ეს პრობლემა საერთაშორისო ზეწოლის მეშვეობით", - განაცხადა ბოკერიამ.