5 დეკემბერს, ცენტრალური საარჩევნო კომისიის წარმომადგენლები საქართველოში ვიზიტით მყოფ ევროპის საბჭოს საპარლამენტო ასამბლეის მონიტორინგის კომიტეტის დელეგაციის წარმომადგენლებს შეხვდნენ.

ცესკოს თავმჯდომარის მოადგილე გიორგი შარაბიძე ასამბლეის ადამიანის უფლებების და საზოგადოებრივ საქმეთა კომიტეტის ხელმძღვანელს ბორის სილევიჩს, ასამბლეის მონიტორინგის კომიტეტის სამდივნოს უფროსის მოადგილეს ბასკლეინს და საქართველოში ევროსაბჭოს ოფისის ხელმძღვანელს კატერინა ბოლონეზეს უკვე ჩატარებული თვითმმართველობის არჩევნების, წარმატებული გამოცდილების და გამოწვევების შესახებ ესაუბრა.

შეხვედრის განმავლობაში დელეგაცის წევრებმა წინასაარჩევნო გარემო და კენჭისყრის პროცედურები განიხილეს. როგორც ბორის სილევიჩმა აღნიშნა, საარჩევნო ადმინისტრაციამ წარმატებით გაართვა თავი, თავისი სპეციფიკიდან გამომდინარე ერთ-ერთი ურთულესი არჩევნების ორგანიზებას. ევროპის საბჭოს დელეგაცია ასევე დაინტერესდა არჩევნების პერიოდში საარჩევნო ადმინისტრაციაში შემოსული განცხადება/საჩივრების რაოდენობით და ამომრჩეველთა ერთიანი სიის ფორმირების პროცესით.

გიორგი შარაბიძემ შეხვედრის მონაწილეებს უკვე არასაარჩევნო პერიოდში საარჩევნო ადმინისტრაციის მიერ განსახორციელებელი აქტივობების შესახებაც მიაწოდა ინფორმაცია და ცესკოს სტრატეგიული გეგმის შემუშავების პროცესი გააცნო, რომელზეც კომისიამ 2014 წლის ოქტომბრიდან დაიწყო მუშაობა.

ევროსაბჭოს მონიტორინგის კომიტეტის დელეგაცია საქართველოს 3 დეკემბერს ესტუმრა. ვიზიტის ფარგლებში მათ სხვადასხვა სამთავრობო უწყებების და საკანონმდებლო ორგანოს წარმომადგენლებთან გამართეს შეხვედრები. ევროპის საბჭოს საპარლამენტო ასამბლეის მონიტორინგის კომიტეტის დელეგაცია საქართველოს დღეს დატოვებს.