„ნაციონალური მოძრაობის“ წევრი გივი თარგამაძე „ქართული ოცნების“ აღმასრულებელი მდივნის პოსტიდან ზვიად ჯანყარაშვილის წასვლას „ფეისბუქზე“ ეხმაურება.

„მიუხედავად იმისა, ზვიად ჯანყარაშვილი გააკონტროლებს პროცესებს პარტიის აღმასრულებელი მდივნის, შსს გენინსპექციის უფროსის, თუ, თამაზაშვილის მსგავსად, თავისუფალი ფორვარდის პოზიციიდან; მიუხედავად იმისა, რომ დაიფიცეს, არსად აღარ დავნიშნავთო; მიუხედავად იმისა, დაახურა თუ არა მის გამო მაჯლაჯუნამ ჰაკიმს თავზე ზვიგენი: სანამ მთავრობა თავიდან ბოლომდე ამ მაფიოზური ოჯახის წევრებითა (ზედელაშვილებით, შავლიაშვილებით და ა.შ.) არის დაკომპლექტებული და მუშაობს პრინციპით: არაოჯახურ მთავრობის წევრებს - კოსმოსური მასშტაბის ხელფასები, დამატებები, პრემიები; ოჯახურ მთავრობის წევრებს - ინფრასტრუქტურაზე სრული კონტროლი, უკიდეგანო კორუფცია; ზვი-ძინს - შუშის სიმშვიდე, იდილია; ხალხს - ზებრის თავფეხი: ვერანაირი ანტურაჟული ცვლილებები და ფიცი-მტკიცი გამოსწორებაზე ვერ შეაჩერებს საუბრებს ნათესაობაზე და ლარის ყოველ გაქცევაზე ყველას გაახსენდება - შუშის კლოუნი დაქირავებული ოჯახის და მისი უკიდეგანო სანათესაოს ხელით საქართველოს თითოეულ მოქალაქეს, ბავშვს, უმწეოს, მოხუცს პირიდან უკანასკნელ ლუკმას ართმევს და საყვარელ ზვიგენს ასაზრდოებს. დადგმებს და ტაკიმასხარაობას შეეშვით, ყველაფერი თავის ადგილზე დადგება, როცა ზვიგენთან მოცეკვავე დაიმკვიდრებს მისთვის კუთვნილ ადგილს მერვე საპყრობილეში“, - წერს თარგამაძე.