,,დროა მოსკოვმა შეიგნოს, რომ მსოფლიო არასოდეს აღიარებს სისხლიან ხელისუფლებას“

პოლიტიკა - 16:18, 05 Dec, 2014

987

,,აფხაზეთის საოკუპაციო რეჟიმის ერთ-ერთმა სტრუქტურამ, რომელიც თავისთავს ”საგარეო საქმეთა სამინისტროს” უწოდებს, გაღიზიანებული ტონით გამოხატა უკმაყოფილება პრაღის საერთაშორისო მუსიკალური ფესტივალის ”Diamonds Voice 2014”-ის ფარგლებში აფხაზეთის ავტონომიური რესპუბლიკის კულტურის დღეების ჩატარებასთან დაკავშირებით... მსგავსი პოზიცია რუსეთის მოქალაქეებით დაკომპლექტებული არალეგიტიმური დაწესებულების მხრიდან მოულოდნელი არ ყოფილა. დროა, მოსკოვმა შეიგნოს, რომ საერთაშორისო სამართალი, მსოფლიო თანამეგობრობა არასოდეს აღიარებს ეთნიკური წმენდის შედეგად სოხუმში აღმოცენებულ და ოკუპანტი ქვეყნის ხიშტებზე დამყარებულ მარიონეტულ, სისხლიან ხელისუფლებას, რომელიც შუასაუკუნეობრივი მეთოდებით დღემდე ფეხქვეშ თელავს ადამიანის ელემენტარულ უფლებებს. აფხაზეთის მოსახლეობის დიდი უმრავლესობის ნების გამომხატველი ერთადერთი ლეგიტიმური სახელისუფლებო ორგანოა აფხაზეთის ავტონომიური რესპუბლიკის უმაღლესი საბჭო და მის მიერ დანიშნული მთავრობა.

აფხაზეთის ავტონომიური რესპუბლიკის ლეგიტიმური ხელისუფლება თავისი კომპეტენციისა და შესაძლებლობების ფარგლებში კვლავაც გააგრძელებს და ზრუნვას ოკუპირებულ ტერიტორიაზე დარჩენილ მოსახლეობაზე - ჩვენთვის უაღრესად ძვირფას თანამემამულეებზე, განურჩევლად მათი ეროვნებისა; გააგრძელებს მსოფლიო საზოგადოებრიობის ინფორმირებას აფხაზეთის ოკუპაციის შედეგად იქ დატრიალებული ტრაგედიისა და ჰუმანიტარული კატასტროფის შესახებ", - ნათქვამია აფხაზეთის ა/რ უმაღლესი საბჭოს განცხადებაში.

შეგახსენებთ აფხაზეთის საოკუპაციო რეჟიმის ე.წ საგარეო საქმეთა სამინისტრომ, პროტესტი გამოთქვა ჩეხეთში „აფხაზეთის დღეების“ გამართვასთან დაკავშირებით და განაცხადა რომ დევნილ ხელისუფლებას აფხაზეთის ოფიციალურ სტრუქტურებთან არანაირი კავშირი არ გააჩნია და არალეგიტიმურია. მათი განცხადებით აფხაზეთის ავტონომიიური რესპუბლიკის ხელისუფლება საქართველოს ხელისუფლების ნაწილია და ისინი არ შეიძლება წარმოადგენდნენ აფხაზეთის და აფხაზი ხალხის ინტერესებს. საოკუპაციო რეჟიმი აღნიშნულ ფაქტს საქართველოს მხრიდან პროვოკაციულ ნაბიჯად აფასებს.