„ნაციონალები“ და „რესპუბლიკელები“- ახალი გადაჯგუფება პარლამენტში?!

პოლიტიკა - 15:08, 05 Dec, 2014

4141

საპარლამენტო უმრავლესობის დეპუტატი დავით საგანელიძე „ნაციონალური მოძრაობისა“ და „თავისუფალი დემოკრატების“ დაჯგუფებას არ გამორიცხავს, ამასთანავე მისი აზრით უმრავლესობის წევრი განსხვავებული აზრის ქონის მიუხედავად უმრავლესობის პოზიციასა და პრინციპს უნდა დაემორჩილოს.

„ არ გამიკვირდა, რომ „რესპუბლიკელებმა“ და „თავისუფალმა დემოკრატებმა“ „ქართული ოცნების“ მიერ მოწონებულ კანონპროექტს მხარი არ დაუჭირეს. საერთოდ, ცხოვრებაში აღარაფერი მიკვირს. კოალიციისგან პრეზიდენტის გამიჯვნა „თავისუფალ დემოკრატებს“ მოეწონათ და თქვეს, ჩვენც მარგველაშვილთან ვართო. „რესპუბლიკელების“ პოზიცია თავიდანვე გასაგები იყო, რადგან მათ პარლამენტში კანონპროექტის სხვა ვარიანტი შემოიტანეს, მაგრამ საბოლოოდ, ისინიც ამ ფლანგს შეუერთდნენ და დაჯგუფდნენ. როცა უმრავლესობის წევრი გქვია, მოგწონს თუ არა, უმრავლესობის პოზიციასა და პრინციპს უნდა დაემორჩილო!“- აცხადებს საგანელიძე.

საგანელიძე მომავალში „ნაციონალების“, „რესპუბლიკელების“ და „თავისუფალი დემოკრატების“ ერთ პოზიციაზე ყოფნას არ გამორიცხავს, და „რესპუბლიკელების“ და „ნაციონალების“ შესაძლო დაჯგუფებაზეც საუბრობს. საგანელიძის თქმით, მას იმედი აქვს რომ ოპოზიციაში გადასულ „თავისუფალ დემოკრატებთან“ მომავალშიც ითანამშრომლებს.

„არ ვიტყვი, რომ რესპუბლიკელებსა და ნაციონალებს საერთო მიზნები და პოლიტიკური ამოცანები აქვთ, მაგრამ არ გამოვრიცხავ ნაციონალები და რესპუბლიკელები რაღაც პერიოდში დაჯგუფდნენ. დარწმუნებით მხოლოდ საკუტარ თავზე შემიძლია გითხრათ - ნაციონალებთან არც ერთ კოალიციაში, არასოდეს დავჯგუფდები! ამას გამოვრიცხავ, თორემ „თავისუფალ დემოკრატებთან“ ერთად შესაძლებელია ბევრი რამ ერთობლივად ვაკეთოთ. გული მწყდება , რომ დღეს სხვადასხვა ფლანგზე ვართ“- აღნიშნა უმრავლესობის ლიდერმა გაზეთ „ვერსიასთან“ საუბარში.