რუსეთსა და აფხაზეთს შორის გაფორმებულ ე.წ. დოკუმენტთან დაკავშირებით ქართული მხარის პოზიციას ნატოც იზიარებს.

ამის შესახებ ნატოს გენერალური მდივნის სპეციალური წარმომადგენელმა სამხრეთ კავკასიაში ჯეიმს აპატურაიმ თბილისის აეროპორტში განაცხადა.

მისი თქმით, ალიანსის გენერალურმა მდივანმა ე.წ. დოკუმენტთან დაკავშირებით უკიდურესი შეშფოთება გამოხატა.

„მოუთმენლად ველი დისკუსიებს პრემიერ-მინისტრთან და მაქვს შანსი შევხვდე ახალ მინისტრებს. ყველაზე მნიშვნელოვანი რასაც გავაკეთებთ იქნება ის, რომ ვიზიტის ფარგლებში ვნახავთ საქართველოსთვის მინიჭებული პაკეტის განხორციელების პროცესს. ეს ძალიან კარგი დასაწყისია. გენერალური მდივანის მოადგილე და მე საქართველოში უახლოეს ხანში ვგეგმავთ ჩამოსვლას, რათა მოვემზადოთ თებერვალში დაგეგმილი თავდაცვის მინისტრების შეხვედრისთვის. გვინდა, რომ მივაღწიოთ პროგრესს. ვიზიტის ფარგლებში ვაპირებ ვისაუბრო პოლიტიკურ ვითარებაზე. გენერალურმა მდივანმა გამოხატა უკიდურესი შეშფოთება რუსეთსა და აფხაზეთს შორის გაფორმებულ ხელშეკრულებასთან დაკავშრებით. ვიცი, რომ არსებობს შეშფოთების საფუძველი სამხრეთ ოსეთთან მიმართებაშიც. ეს ე.წ. ხელშეკრულება საქართველოს ტერიტორიული მთლიანობის კიდევ ერთი დარღვევაა, თუმცა მას აქვს განსხვავებული ხასიათი. მავთლუხლართებისგან განსხვავებით, ეს არის ეკონომიური ინტეგრაცია და სოციალურ საკითხებსაც ითვალისწინებს. ჩემმა ქართველმა კოლეგებმა ამ პროცესს მცოცავი ანექსია უწოდეს და ჩვენ გავიზიარეთ მათი აზრი“, - განაცხადა აპატურაიმ.

აპატურაი თბილისში რამდენიმე საათის წინ ჩამოვიდა. პირველი შეხვედრა მას თავდაცვის სამინისტროში აქვს დაგეგმილი