შეზღუდული შესაძლებლობების მქონე პირთა უფლებების დაცვის დღესთან დაკავშირებით საქართველოს პრეზიდენტი განცხადებას ავრცელებს.

„ძვირფასო თანამოქალაქენო, დღეს მთელ მსოფლიოში შეზღუდული შესაძლებლობების მქონე პირთა უფლებების დაცვის დღე აღინიშნება.

რაიმე უნარის შეზღუდვა აუცილებლად კომპენსირდება სხვა უნართა განსაკუთრებული განვითარებით. ჩემი თქვენდამი დამოკიდებულება სწორედ თქვენი შესაძლებლობების პატივისცემას ეფუძნება. ღრმად მწამს, რომ თქვენი ნიჭისთვის ფართო გზის მიცემა აუცილებელია როგორც თქვენი ღირსეული ცხოვრებისთვის, ისე საზოგადოების სრულფასოვანი, ყოველხმრივი განვითარებისთვის.

ამიტომ, თქვენს შესაძლებლობათა სრულად გამოვლენისა და ქვეყნის სასიკეთოდ გამოყენების პირობა შექმნა ყველა ჩვენგანის, საზოგადოების თითოეული წევრის მოვალეობაა. მე, როგორც ქვეყნის პრეზიდენტი, თქვენს უფლებათა უპირველეს დამცველად მიგულეთ.

კეთილდღეობას, ჯანმრთელობასა და ბედნიერებას გისურვებთ თქვენ და თქვენს ოჯახებს“, - ნათქვამია განცხადებაში.