„ნაციონალური მოძრაობა“ სოციალურად დაუცველთა დახმარების შესახებ ჯანდაცვის მინისტრის ახალ რეფორმას აკრიტიკებს.

როგორც პარტიის ერთ-ერთმა ლიდერმა ზურაბ ჭიაბერაშვილმა განაცხადა, ახალი რეფორმა მარტოხელა პენსიონერებს სოციალური დახმარების გარეშე დატოვებს.

„ნაციონალური მოძრაობა“ დავით სერგეენკოსგან სოციალურად დაუცველთა ბაზაში დღეს მყოფ პენსიონერთა დაცვის სპეციალურ გარანტიებს და მარტოხელა პენსიონერთა შინმოვლის ცალკე პროგრამების შემუშავებას მოითხოვს.

„სამინისტროს მიერ ჯანდაცვის საპარლამენტო კომიტეტზე წარმოდგენილი მონაცემების მიხედვით, ახალი მეთოდოლოგიით ფულად დახმარებას 141,831 ოჯახის ნაცვლად 106,000 ოჯახი მიიღებს. ამ ოჯახებიდან ყველა ვეღარ მიიღებს დახმარების იმავე ოდენობას, რასაც ადრე იღებდა ანუ სულზე საშუალოდ 52 ლარის ნაცვლად, ზოგიერთი ოჯახი 40 ან 30 ლარს მიიღებს. იმის გამო, რომ ზედიზედ მეორედ ბიუჯეტს ვერ სრულდება, ივანიშვილის მთავრობა ცდილობს, ფული ყველაზე გაჭირვებული ადამიანების ხარჯზე დაზოგოს. სერგეენკოს მორიგი რეფორმით, სოციალური დახმარება მარტოხელა პენსიონერს და ცალკე მცხოვრებ პენსიონერ ცოლ-ქმარს შეუწყდება“, - განაცხადა ჭიაბერაშვილმა.