უკრაინაში საქართველოს ელჩი, მიხეილ უკლება, თანამდებობიდან წასვლის და მის ზვიად ჯანყარაშვილით ჩანაცვლების შესახებ გავრცელებულ ინფორმაციას არ ადასტურებს.

ამის შესახებ მან „რუსთავი 2“-თან საუბრისას განაცხადა.

„არ ვადასტურებ ინფორმაციას ჩემი გადადგომის შესახებ. მე ვრჩები თანამდებობაზე და რატომ გავრცელდა ეს ინფორმაცია, არ ვიცი. ჰკითხეთ მათ, ვინც ეს დაწერეს. მე არ მაქვს მიზეზი, რომ დავტოვო თანამდებობა,“ - განაცხადა მიხეილ უკლებამ.

მიხეილ უკლებას თანამდებობიდან წასვლის და მის ადგილზე ზვიად ჯანყარაშვილის დანიშვნის შესახებ ინფორმაცია გუშინ, ბეჭდური მედიით გავრცელდა.

გავრცელებულ ინფორმაციას უარყოფენ მართველ გუნდშიც. როგორც დეპუტატი გია ვოლსკი აცხადებს, ეს საკითხი პოლიტსაბჭოს სხდომაზე არ განხილულა. თუმცა აცხადებს რომ ჯანყარაშვილი შეიძლება იყოს იმ ჯგუფის წევრი რომელიც პრემიერის ვიზიტს უკრაინაში მოამზადებს.