პროკურატურამ ე.წ. კაბელების საქმეზე გამოძიება „დელტაკომის“ საჩივრის საფუძველზე დაიწყო. „დელტაკომში“ კი აცხადებენ, რომ თავდაცვის სამინისტრომ ტენდერი შეგნებულად კანონდარღვევით ჩაატარა.

თავდაცვის სამინისტროს ყოფილი მაღალჩინოსნების ადვოკატის განცხადებით, საჩივარი მტკიცებულებებს მოკლებულია.

სოსო ბარათაშვილის თქმით, არ არსებობს საქმეში არანაირი მტკიცებულება, რომელიც თავდაცვის სამინისტროს ყოფილი თანამშრომლების ბრალეულობას დაამტკიცებს.

„გამოძიება დაწყებულია „დელტაკომის“ საჩივრის საფუძველზე. როდესაც ჩატარდა ექსპერტიზა , ექსპერტმა დაუძახა „დელტაკომის“ წარმომადგენელს და ჰკითხა, რომ თქვენ ამ სამუშაოს ასე ვთქვათ, რა ფასად შეასრულებდით. „დელტაკომის“ წარმომადგენელმაც განაცხადა, რომ ის ამ საქმეს შეასრულებდა უფრო ნაკლებად. თუ ამას გამარჯვებული კომპანია ასრულებდა 6 მილიონად , მე შევასრულებდი ორ მილიონადო. 6 მილიონს გამოაკლეს 2 მილიონი და მიიღეს 4 მილიონი და ეს არის თითქოს ასე ვთქვათ გაფლანგული თანხა,“- განაცხადა სოსო ბარათაშვილმა.

თავდაცვის სამინისტროს მაღალი თანამდებობის პირების საქმეზე პროკურატურამ საგამოძიებო ვადის ორი თვით გადაწევა მოითხოვა. ბარათაშვილის ინფორმაციით, პროკურატურამ სასამართლოს შუამდგომლობით წინასასამართლო სხდომის 2015წლის 10 თებერვალამდე გადადების შესახებ მიმართა.

დაკავებულების დამცველებს მიაჩნიათ, რომ პროკურატურა ბრალდების დასაბუთები სსაფუძვლებს ახლა ეძებს და სხდომის გადადება ამ მოტივით მოითხოვა.