უკრაინის პრეზიდენტმა პეტრე პოროშენკომ ალექსანდრე კვიტაშვილს უკრაინის მოქალაქეობა მიანიჭა. პოროშენკომ ასევე, ხელი მოაწერა ორი უცხოელისთვის უკრაინის მოქალაქეობის მინიჭების ბრძანებას. კვიტაშვილთან ერთად, ორივე უცხოელი უკრაინის მთავრობის წევრობის კანდიდატები არიან.

„უკრაინის მოქალაქეობა სამმა უცხოელმა მიიღო: ალექსანდრე კვიტაშვილმა, ნატალი იარესკომ და აივარას ამბრამოვიჩმა“ , - წერს უკრაინის პრეზიდენტი „ტვიტერის“ საკუთარ გვერდზე.

როგორც ცნობილია, უკრაინის მოქალაქეობაზე განაცხადი, ეკა ზღულაძესაც აქვს შეტანილი.

საქართველოს ექსპრეზიდენტმა მიხეილ სააკაშვილმა დაადასტურა, რომ უკრაინის მთავრობის მოწვევით კიევში საქართველოს ყოფილი თანამდებობის რამდენიმე პირიც იმყოფება. მისი თქმით, სანდრო კვიტაშვილთან ერთად უკრაინის მთავრობაში თანამდებობები შესაძლოა კიდევ რამდენმე ყოფილმა ქართველმა მაღალჩინოსანმა დაიკავოს.