ზუგდიდში ხანძარს 760 000 ლარიანი სახანძრო მანქანა ჩააქრობს

პოლიტიკა - 15:18, 02 Dec, 2014

3351

ზუგდიდის მომავალი 2015 წლის ბიუჯეტი არ გაზრდილა და დაახლოებით იგივე დარჩა რაც წინა წლებში იყო - 15 მილიონ ლარზე ცოტა მეტი. გაზეთ „ქრონიკა+“-ის ინფორმაციით, ბიუჯეტის განხილვისას, ზუგდიდის მერმა განაცხადა, - „გზებს ალბათ 2016 ან 2017 წლამდე ვერ დავაგებთო“

ასევე ცნობილი ხდება, რომ ზუგდიდში მოქმედი სასულიერო სემინარია დაფინანსდება 12 ათასი ლარით, ხოლო ივერიის ღვთისმშობლის ხატის ეკლესიის მშენებლობისთვის 100 ათასი ლარია გათვალისწინებული, ახალგაზრდული პროგრამების დაფინანსებისთვის კი 50 ათასია გამოყოფილი.

სოციალური და ჯანდაცვის პროექტებისთვის 850 ათასი ლარი, ხოლო ერთი სახანძრო მანქანისთვის 760 ათასი ლარია გათვალისწინებული.

ზუგდიდის ხელმძღვანელობის განცხადებით ამ ღირებულების სახანძრო მანქანა კერძო სამეწარმეო ობიექტებზე ხანძრის წინააღმდეგ ეფექტური ბრძოლისთვის სჭირდებათ.

სახანძრო მანქანის ისტორია წინა ხელისუფლების დროიდან იღებს სათავეს, მანქანის ყიდვა ზუგდიდის ინფრასტრუქტურული განვითარების გეგმის შესრულების პარალელურად იგეგმებოდა, ანუ როცა ქალაქი გაფართოვდებოდა, ინვესტიციები წამოვიდოდა და ქალაქის ბიუჯეტი გაიზრდებოდა, ძვირადღირებული ცეცხლმაქრი შემდგომ უნდა ეყიდათ. მანამდე კი გაარკვიეს, კონკრეტულად რომელ მანქანას, რა მოდელს შეიძენდნენ და დაიწყეს სათადარიგო ნაწილების შეძენა ამ მანქანისთვის.

„ქართული ოცნების“ ხელისუფლებამ მიიჩნია, რომ „ნაციონალების“ დროს ამ კუთხით რაღაცას თაღლითობდნენ და ზუგდიდის სახანძრო რაზმის უფროსი დაკითხვებზე ატარეს. იმ საბაბით თუ რატომ ყიდულობდნენ სათადარიგო ნაწილებს და რა საჭიროებას წარმოადგენდა ამხელა ღირებულების მანქანის შეძენა.

ხელისუფლებაში მოსვლისთანავე ეს მანქანა საჭირო გახდა, სახანძრო სამსახურის უფროსის თამაზ უბილავას განცხადებით: ეს მანქანა მუზეუმში გაჩენილ ხანძრებს აქრობს ისე, რომ ექსპონატები არ ზიანდება, მისივე თქმით ასეთი მანქანა ევროპის ბევრ ქვეყანასაც კი არ აქვს.

წყარო „ ქრონიკა+“