შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი მიიჩნევს, რომ აბაშიძე-კარასინის ფორმატი არ უნდა გადაიხედოს.

ამის შესახებ ზაქარეიშვილმა მთავრობის სხდომის დასრულების შემდეგ განაცხადა.

მისი თქმით, რუსეთთან ურთიერთობისთვის ეს ფორმა ყველაზე მისაღებია.

„მიმაჩნია, რომ აბაშიძე-კარასინის ფორმატი ერთ-ერთი მნიშვნელოვანი ფორმატია და ის არ უნდა გადაიხედოს. ვინაიდან, ჩვენ რუსეთთან დიპლომატიური ურთიერთობა არ გვაქვს, ამ ფონზე ეს ფორმატი ძალიან მნიშვნელოვანია. ამ ფორმით უნდა არსებობდეს რუსეთთან ურთიერთობა. ჩემი აზრით, ეს ფორმა ყველაზე მისაღებია. ეს ფორმა ნაკლებად არის სამართლებრივად გაფორმებული და მხოლოდ პოლიტიკური ხასიათი აქვს. ამ ფორმატის საშუალებით ბევრი საკითხის გადაწყვეტა შეიძლება“, - განაცხადა ზაქარეიშვილმა.