თავდაცვისა და უშიშროების კომიტეტის თავმჯდომარემ, ირაკლი სესიაშვილმა, ძალოვანი უწყების შესაძლო ტრანსფორმირებაზე ჟურნალისტებთან ისაუბრა.

სესიაშვილი მიიჩნევს, რომ ძალოვანი უწყებების შემდგომი ტრანსფორმაციის პერიოდი მომწიფებულია, მაგრამ საკითხი საზოგადოებრივ მსჯელობას მოითხოვს.

სესიაშვილის განცხადებით, უსაფრთხოების სექტორის განვითარება და რეფორმირება თითოეული დემოკრატიული სახელწიფოს გამოწვევაა, მისი თქმით, 2012 წლის შემდგომ, შინაგან საქმეთა სამინისტროს დეპოლიტიზება მოხდა, თუმცა, ეს საკმარისი არ არის.

„გარკვეულ ეტაპზე გადასვლა თავის დროს და მოცემულობას საჭიროებს. შემდგომი ტრანსფორმაციის პერიოდი მომწიფებულია, თუმცა საკითხი ფართო საზოგადოებრივ მსჯელობას მოითხოვს. სიჩქარე საჭირო ნამდვილად არ არის, არამედ შედეგზე და ისეთი სისტემის ფორმირებაზე უნდა ვიყოთ ორინტირებულნი, რომელიც ერთის მხრივ, ყველა საფრთხეს ადეკვატურად უპასუხებს, მეორეს მხრივ კი, ჩვენი მოქალაქეების უფლებები და ინტერესები გარანტირებული იქნება“, - განაცხადა სესიაშვილმა.

შეგახსენებთ, რომ გასულ სასესიო კვირას, პარლამენტის თავმჯდომარემ ძალოვანი უწყებების რეფორმირება მოითხოვა.