ექსპერტი გია ხუხაშვილი პრემიერ მინისტრ ზურაბ ჟვანიას გაურკვეველ ვითარებაში გარდაცვალებას აგათა კრისტის რომანში „მკვლელობა აღმოსავლეთ ექსპრესში“ განვითარებულ სიუჟეტს ადარებს და არ გამორიცხავს, რომ თავდასხმას, რომელიც მასზე ჟვანიას გარდაცვალებამდე რამდენიმე დღით ადრე განხორციელდა, იგივე ჟვანიას მკვლელობასთან ქონდეს კავშირი.

„იმ მატარებელში, სადაც ჟვანია იჯდა, ყველა მგზავრი მისი ლიკვიდაციით იყო დაინტერესებული. ზურა იყო სააკაშვილის არაჯანსაღი გეგმების ერთადერთი ბარიერი, რომლის პოლიტიკური მეთოდებით გვერდზე გაწევაც შეუძლებელი იყო. პოლიტიკაში კი ცნობილია, როდესაც ინტელექტუალურად ვერ უგებენ, ნაჯახით იწყებენ მუშაობას.

როგორც პოლიტიკური, ისე ეკონომიკური წრიდან ჟვანიას გარდაცვალება არავის წყენია, შემიძლია ვთქვა, რომ ამათგან ზოგიერთები წავიდნენ კიდეც მის ლიკვიდაციაზე.“- აცხადებს ხუხაშვილი.

გია ხუხაშვილის თქმით, არსებობს ვერსია, რომ ჟვანიას მკვლელობამდე 10 დღით ადრე მასზე თავდასხმა და ზურაბ ჟვანიას მკვლელობა შესაძლოა ერთმანეთს უკავშირდებოდეს.

„დილით ძაღლს ვასეირნებდი, შენობის კუთხეს ამოფარებულმა პირმა ბლაგვი საგანი იმდენად პროფესიონალურად ჩამარტყა, რომ ქვედა და ზედა ყბა აბსოლუტურად ჩამემსხვრა.

შემთხვევიდან რამდენიმე დღით ადრე ჩემი სტატია გამოქვეყნდა, სადაც ვამხელდი რკინიგზაში მიმდინარე პრივატიზაციისა და კორუფციიის სქემებს. გარდაცვალებამდე ერთი კვირით ადრე ზურამ დამირეკა და მიმანიშნა , რომ ეს ყველაფერი უკავშირდებოდა რკინიგზას. ამის მერე ზურა ცოცხალი აღარ მინახავს.

ზურას უახლოეს წრესაც არ დაუსვამს ლოგიკური კითხვები მის ტრაგედიასთან დაკავშირებით, არჩევანი გააკეთეს და ამ არჩევანის მძევლები არიან“- აცხადებს ხუხაშვილი.

წყარო „ასავალ-დასავალი“