ვეტოდძლეულ კანონს, რომელსაც პრეზიდენტმა ხელი უკვე მოაწერა, საქართველოში ამერიკის შეერთებული შტატების ელჩი, რიჩარდ ნორლანდი ამოეხმაურა.

როგორც, ნორლანდმა ჟურნალისტებს ფარული მოსმენების შესახებ კანონთან დაკავშირებით განუცხადა, უკვე მიღებული გადაწყვეტილების შემდეგ, საელჩო პროცესების და შედეგების დაკვირვებას გეგმავს რადგან მათ სურთ გაიგონ რამდენად კმაყოფილია ქართული საზოგადოება.

„ჩვენ ვაკვირდებით მიმდინარე მოვლენებს. თუ სწორად გავიგე პრეზიდენტის ვეტო დაძლეულია და კანონი ძალაში შევა. ეს მრავალხმრივი პროცესია, რომელშიც სისტემის მრავალი შემადგენელი ნაწილია ჩართული. მათ შორის სამოქალაქო სექტორიც. ყველა საზოგადოებამ უნდა იპოვოს სწორი ბალანსი სამართალდამცველების მიერ უსაფრთხოების მიზნებისთვის ფარული მოსმენების განხორციელებასა და ადამიანის პირადი ცხოვრების დაცულობას შორის. ჩვენ დავაკვირდებით შედეგებს, რათა გავიგოთ, რამდენად კმაყოფილია ქართული საზოგადოება", -განაცხადა ნორლანდმა.

შეგახსენებთ, რომ პარლამენტმა ფარული მოსმენების "გასაღებთან" დაკავშირებით პრეზიდენტის ვეტო დაძლია, მარგველაშვილმ კი ვეტოდაძლეულ კანონპროექტს ხელი უკვე მოაწერა.

ბესელია-ფოფხაძე-სესიაშვილის საკანონმდებლო პაკეტის თანახმად, დაწესდა ფარული მოსმენა-მიყურადების ე.წ. ორგასაღებიანი სისტემა, რომელთაგან ერთი "გასაღები" შს სამინისტროს რჩება, მასვე ექნება შესაბამის კომუნიკაციის საშუალებებზე პირდაპირი წვდომის შესაძლებლობა. მეორე "გასაღები" პერსონალურ მონაცემთა დაცვის ინსპექტორის ხელში იქნება.