„ჩემი ქალაქი - ჩემი ოცნება“ - ამ სახელწოდებით გაიმართა დამეგობრებული და პარტნიორი ქალაქების საერთაშორისო კონფერენცია ჩინეთის სახალხო რესპუბლიკის ქალაქ გუანჯოუში. კონფერენციას 56 ქვეყნის 260-მდე ქალაქის დელეგატი ესწრებოდა. მათ შორის, ჩინეთში ვიზიტად მყოფი ქალაქ თბილისის მერიისა და საკრებულოს დელეგაცია, რომელსაც დედაქალაქის მერი, დავით ნარმანია და საკრებულოს თავმჯდომარე, გიორგი ალიბეგაშვილი ხელმძღვანელობენ.

კონფერენციის მიზანი ქალაქებს შორის პარტნიორობის გაღრმავება და ახალი ეკონომიკური, კულტურული და ტურისტული კავშირების დამყარება იყო.

კონფერენციის პარალელურად, გაიმართა ურბანული ინოვაციების მეორე საერთაშორისო ფორუმი, რომელზეც თბილისის მერი დავით ნარმანია საქართველოს შესახებ ვრცელი მოხსენებით გამოვიდა.

დედაქალაქის მერმა ხაზი გაუსვა ჩინეთ-საქართველოს შორის ურთიერთობებს, მათ შორის, ქალაქ გუანჯოუსთან თანამშრომლობას და სამომავლო პერსპექტივებს იმ მნიშვნელოვანი ინიციატივის ფარგლებში, რასაც აბრეშუმის გზის პროექტების შემდგომი განვითარება ჰქვია. ნარმანიამ, ასევე, ისაუბრა ქვეყნის საინვესტიციო პოტენციალსა და საქართველოში არსებულ მარტივ ადმინისტრაციულ შესაძლებლობებზე, რაც ინვესტორებისთვის მიმზიდველი და მისაღებია.

როგორც თბილისის მერმა თავის გამოსვლაში აღნიშნა, ბოლო რამდენიმე წლის განმავლობაში საქართველოში ჩინური ინვესტიციები მნიშვნელოვნად გაიზარდა.

„იზრდება ორმხრივი ვაჭრობა და საქართველოში ჩინელ ვიზიტორთა რიცხვი. ჩინეთი არის საქართველოს ხუთ უმსხვილეს სავაჭრო პარტნიორთა შორის. ვითარდება ურთიერთობები კულტურისა და განათლების სფეროებში. საქართველოში საქმიანობს 25-მდე ჩინური კომპანია, მათ შორის, საინვესტიციო, სამშენებლო, სავაჭრო, სატელეკომუნიკაციო და საფინანსო კომპანიები.ჩვენი მიზანია ამ პოზიტიური დინამიკის შენარჩუნება და ორმხრივი თანამშრომლობის კიდევ უფრო განმტკიცება,“ - განაცხადა თბილისის მერმა.

დავით ნარმანიამ იმედი გამოთქვა, რომ ჩინეთის ერთ-ერთ უმსხვილეს ქალაქთან - გუანჯოუსთან ურთიერთობების გაღრმავება ხელს შეუწყობს მუნიციპალური მართვის სფეროში საინტერესო და ინოვაციური პროექტების განსახორციელებას.

ქართული დელეგაცია ჩინეთის სახალხო რესპუბლიკაში ვიზიტს 1 დეკემბერს დაასრულებს.