საქართველოს საგარეო საქმეთა მინისტრი, თამარ ბერუჩაშვილი საქართველოში მიმდინარე მოვლენებზე, რუსეთ-აფხაზეთს შორის დადებულ ხელშეკრულებაზე კომენტარს აკეთებეს. ბერუჩაშვილი საერთაშორისო თანამეგობრობის აქტიური ჩართულობის აუცილებლობაზე საუბრობს:

„საგარეო პოლიტიკა, ქართული დიპლომატია მობილიზებულია იმისათვის, რომ მაქსიმალურად მოიპოვოს მხარდაჭერა, გამოიყენოს ყველა ფორმატი ამ მხარდაჭერის მოსაპოვებლად, ხმამაღლა ისაუბროს ბოლო დროინდელ მოვლენებზე, საფრთხეებზე, რომელიც არის ქვეყანაში და ზოგადად რეგიონში, რათა შევძლოთ რეგიონში არსებული პრობლემის მშვიდობიანი გზით მოგვარება, საერთაშიროსო თანამეგობრობის ყველაზე აქტიური და სრულფასოვანი ჩართულობით ვიმუშაოთ უთანხმოებების მოსაგვარებლად.

დღვანდელი დღე ეუთო-ში საგარეო საქმეთა მინისტრის მოადგილის, დავით დონდუას გამოსვლით დაიწყო, რომელიც გუშინ სპეცილური მისიით გაემგზავრა, რათა გამოიყენოს ეს ფორმატი ჩვენი პოზიციის დასაფიქსირებლად.

ასეთივე გამოსვლები ჰქონდა ჩვენს ელჩს ევროსაბჭოს მინისტრების მოადგილეების კომიტეტზე და ამ გამოსვლამ ძალიან სერიოზული მხარდაჭერა მოიპოვა. პრაქტიკულად არ დარჩა არცერთი ჩვენი პარტნიორი ქვეყანა თუ ორგანიზაცია, რომელმაც არ დაგმო რუსეთის ქმედება და არ შეაფასა ეს ნაბიჯი როგორც სერიოზული საფრთხე რეგიონში მშვიდობისა და სტაბილურობის განვითარების საქმეში.

ქართული სახელმწიფოს პოზიცია, გამოიყენოს ყველა საშუალება მხოლოდ მშვიდობიანი გზით და აქტიური თანამშრომლობით, ვიმუშაოთ ამ საკითხის დარეგულირებისთვის, ეს პროცესი არის ხანგრძლივი, საჭიროებს დიდ მოთმინებას და ამავდროულად გაათმაგებულ დიალოგს საერთაშორისო დონეზე“, - განაცხადა თამარ ბერუჩაშვილმა.