გარემოს დაცვის ყოფილი მინისტრის ხათუნა გოგალაძის მიერ გათავისუფლებული გიორგი შოვნაძე დაცული ტერიტორიების სააგენტოს უფროსის თანამდებობაზე აღდგენილია.

სასამართლოს გადაწყვეტილების გამო თანამდებობის დატოვება სააგენტოს მოქმედ უფროსს რატი ჯაფარიძეს 1 დეკემბერს მოუწევს.

ჯერჯერობით უცნობია დაბრუნდება თუ არა შოვნაძე თანამდებობაზე. მისი თქმით, აღნიშნულთან დაკავშირებით გადაწყვეტილებას მას შემდეგ მიიღებს, რაც მოქმედი უფროსი თანამდებობას დატოვებს.

„ბრალდება ეხებოდა არამიზნობრივ ხარჯვას, ეს ეხებოდა სათაფლიის და პრომეთეს მღვიმის, ასევე ოკაცეს კანიონის მშენებლობებს, რომელიც ჩემი ხემძღვანელობით განხორციელდა. სასამართლომ სამართლიანი გადაწყვეტილება მიიღო. ხათუნა გოგოლაძის უსაფუძვლო ბრალდება ჩემთვის მიუღებელი იყო“, - აცხადებს შოვნაძე „კურიერთან“ საუბრისას.

დაცული ტერიტორიების სააგენტოს ყოფილი უფროსი თანამდებობიდან 2013 წლის მაისში, ხათუნა გოგალაძის გადაწყვეტილებით გათავისუფლდა. გამოძიება მას კონტრაქტორი ორგანიზაციების საგადასახადო შემოწმების არასრულყოფილად განხორციელებას და არასწორ ხარჯთაღრიცხვას ედავებოდა.