პარლამენტის ბიუროს დღევანდელი სხდომა ხმაურით დაიწყო. დაპირისპირების მიზეზი ანტიანექსიური რეზოლუციის რეგისტრაციის საკითხი გახდა. „ნაციონალური მოძრაობა“ პროექტის დღევანდელ სესიაზე გატანას ითხოვდა, თუმცა, მანანა კობახიძემ რეგლამენტი მოიშველია და განაცხადა, რომ რადგანაც რეზოლუცია ბიუროზე არ იქნა წარდგენილი, მისი დარეგისტრირება და სესიაზე გატანა ვერ მოხერხდება.

ვიცე-სპიკერის ამ განცხადებას, მასსა და ხათუნა გოგორიშვილს შორის სიტყვიერი დაპირისპირება მოჰყვა.

საპარლამენტო ოპოზიცია, აბაშიძე-კარასინის ფორმატის გაუქმებას და რუსეთის წინააღმდეგ დაწესებულ სანქციებთან მიერთებას ითხოვს. მმართველ გუნდში „ერთიანი ნაციონალური მოძრაობის“ მიერ წარმოდგენილი პროექტის ზოგიერთ მუხლს იწუნებენ და ალტერნატიულ დოკუმენტზე მუშაობენ.