„იმისათვის რომ ტერიტორიული მთლიანობის საკითხი გადაწყდეს სამომავლოდ, ამ მომავლის შენება დღეს უნდა დავიწყოთ“, - ამის შესახებ კომენტარი საქართველოს პარლამენტის თავმჯდომარემ, დავით უსუფაშვილმა „დოიჩე ველესთან“ საუბრისას გააკეთა.

უსუფაშვილი მიიჩნევს, რომ საერთაშორისო თანამეგობრობამ რუსეთთან მოლაპარაკებებისას, უკრაინის საკითხთან ერთად, აფხაზეთი და „სამხრეთ ოსეთიც“ უნდა განიხილოს:

„იურიდიული თვალსაზრისით აფხაზეთსა და რუსეთს შორის დადებული ხელშეკრულება არავითარი ძალის მატარებელი არ არის. მაგრამ ფაქტობრივად, ასეთი ხელშეკრულების დადება შესაძლოა აღვიქვათ, როგორც აფხაზეთის ანექსიის მცდელობა. მე და ჩემი კოლეგები ვცდილობთ მივიტანოთ საერთაშორისო თანამეგობრობამდე, რომ რუსეთის ეს ნაბიჯები უნდა განიხილებოდეს, როგორც ერთი დიდი სურათის ნაწილი. იმას, რასაც რუსეთი უკრაინაში აკეთებს, ცდილობს გაიმეოროს სხვა ქვეყნებთან მიმართებითაც.

ჩვენი მიზანია, რომ ჩვენი პარტნიორები დასავლეთში პუტინთან შეხვედრებისას ყურადღებას ამახვილებდნენ აფხაზეთსა და „სამხრეთ ოსეთზეც“. დიახ, უკარაინა ამ მომენტისათვის გაცილებით აქტუალურია, მაგრამ ამ კონფლიქტური ზონების დავიწყებაც არ შეიძლება. გასაგებია, რომ ჯადოსნური ჯოხის მოქნევით პრობლემა ვერ გადაწყდება. მაგრამ ჩვენი ამოცანა იმაში მდგომარეობს, რომ ეს თემა დაფიქსირებული იყოს ყველა საერთაშორისო მოლაპრაკებაში. რადგან, იმისათვის რომ ტერიტორიული მთლიანობის საკითხი გადაწყდეს სამომავლოდ, ამ მომავლის შენება დღეს უნდა დავიწყოთ. უნდა ვაშენოთ არა ტანკებით, არამედ მსგავსი განცხადებებითა და არგუმენტებით“, - აცხადებს დავით უსუფაშვილი.