„ჩვენი მიზანი არის ამ კურსის ინტერნაციონალიზაცია და აგრეთვე იმ გაუგებარი ირაციონალური პოლიტიკის გადატანა, უფრო რაციონალურ ჭრილში“, - ამის შესახებ კომენტარი საქართველოს პრეზიდენტმა, გიორგი მარგველაშვილმა ლატვიის პრეზიდენტთან ერთად გამართულ პრესკონფერენციაზე გააკეთა:

„ის პრობლემები, რომლის წინაშეც მთელი რეგიონი დადგა 2014 წელს, გაგრძელებაა იმ ტრაგედიისა, რაც 2008-ში მოხდა. საქართველოს მტკიცედ აქვს აღებული კურსი, ამ პრობელემების მშვიდობიანი მოგვარებისკენ.

ამის ფარგლებში ჩვენი მიზანი არის ამ კურსის ინტერნაციონალიზაცია და აგრეთვე იმ გაუგებარი ირაციონალური პოლიტიკის გადატანა, უფრო რაციონალურ ჭრილში. მე მინდა ძალიან მარტივი მაგალითი მოვიყვანო, იმასთან დაკავშირებით, რაც აფხაზეთში ხდება, აფხაზეთში, რომელიც არის საქართველოს განუყოფელი ნაწილი, ამ შეთანხმებით არავინ არ არის კმაყოფილი, აფხაზებიც არიან ამით აღშფოთებულნი. ამ კონფლიქტების შეჯამება მდგომარეობს იმაში, რომ ყველას შეგვიძლია ერთად ცხოვრება და ეს ჯგუფები თავის მომავალს მხოლოდ საქართველოში უნდა ხედავდნენ.

ჩვენი მიზანია, რომ ყველა დაინტერესებული მხარის გაფართოება მოხდეს იმისათვის, რომ მეტი მოთამაშე იყოს ჩართული. ჩვენ უნდა დავინახოთ ის, რომ საქართველოც, უკრაინაც და სხვა ქვეყნებიც თავისი თავისუფალი არჩევანისთვის დასჯილნი არ უნდა იყვნენ. მათი არჩევანი დაცული უნდა იყოს, წინააღმდეგ შემთხვევაში ვითარება არაპროგნოზირებადი ხდება“, - განაცხადა გიორგი მარგველაშვილმა.